美國開國元勳富蘭克林有句名言︰「世上冇確定嘅事，除咗交稅同死亡。」之不過凡事都有例外，好似澳門賽馬會咁，累積拖欠稅款達一億多元，澳門政府唔嗲唔吊懶追數不特止，傳媒踢爆後仲顧左右而言他，一味唧牙膏式回應，有名你叫澳門「特瞞政府」，知點解喇！
澳門賽馬會上個月底至獲延長專營權廿四年半，點知話口未完，即被踢爆自○九年起，賽馬會從未繳交過任何稅項。被問到呢筆糊塗帳，澳門政府一開頭詐傻扮懵，話要查清楚專營合約條文細則，唔怪得有人幫澳門起個「愛瞞」嘅朵。好嘞，問多兩問，澳府終於認馬會有拖欠政府款項，但涉及咩款項、金額幾多又係諱莫如深。當然喇，紙係包唔住火嘅，澳府不認不認還須認，早喺一五年已經發現，賽馬會拖欠包括博彩稅在內嘅兩億幾元。奇就奇在，雖然至今馬會尚欠官府一億五千萬元，但竟然仍獲寬限三年，問你服未！
有當地立法會議員就講得啱嘞，澳門政府恃住錢多，對庫房收入懶懶閒，被傳媒踢爆後解釋又不盡不實，得過且過，簡直離晒大譜。傳媒唔踢爆唔解畫，解畫又解到論論盡盡，澳門政府醜態百出，連危機處理反應都慢過人，態度都hea過人，「特拖政府」果然名不虛傳。話時話，雖則新合約講明澳門當局會定期審核賽馬會財務狀況，確保有足夠資金營運，否則有權中止合同，但大家有眼見，澳門賽馬會之前已經試過以虧損為由要求豁免稅額，萬一情況冇改善，容乜易又係「賽馬會蝕錢，納稅人請客」o架！
一節見則百節知，澳門回歸十九年，表面風光，內裏陰乾，政府縱容賽馬會欠稅唔交只係冰山一角，例如批地亂象，就已經三日三夜數唔完。路環黑沙村最近被揭有人非法填湖造地，三萬平方呎國有土地淪為私人提款機，當局話就話會徹查，但有人一於少理，索性將「地盤」擴大多五萬平方呎，啲人霸官地霸到有恃無恐，講到尾都係睇死澳產官僚胡混度日，有法不執。
冇計喇，上樑不正下樑歪，做大嘅懵吓懵吓，連企業欠稅都不聞不問，做細嘅仲唔有樣學樣咩。離島興建醫院，拖足八年仲係爛地一塊，輕軌鐵路淪為財政無底洞，興建防洪堤又係拖到天荒地老；仲有海關接連兩次倒掛五星旗，無理扣查外國醫生團隊，澳產官僚沒有最劣質，只有更劣質，卻偏偏從來冇人要問責，呢啲咪弱將手下無強兵囉！
難為北大人仲將澳門當寶，捧成一國兩制「光輝典範」，事實啱啱相反，梳打埠烏雲蓋頂，黑幕重重，「混沌典範」就差唔多！