未入正題之前，先同各位溫故知新。律政司司長鄭若驊返工第一日就被踢爆大宅僭建，大批傳媒喺佢門口哺實，點知阿姐冇你班友咁好氣，丟低句「冇補充，尋日已經交代」，然後施施然返入去佢嗰幢地盡其用仲向天空發展嘅府邸，勝似閒庭信步，唔到你唔服。
事情之後點發展，唔使功夫茶多講。隨着鄭若驊不斷被踢爆其他物業有僭建，「冇補充，已交代」淪為「補充補充再補充，交代交代再交代」，而「僭建驊」嘅名聲亦都深入人心，連中學生都忍唔住調寄宋詞《虞美人》，贈番句「僭建僭到何時了，法律知多少。經常質問不回覆，若驊不堪回首僭建屋」佢歎吓。
睇到呢度，相信大家都會明白，喺鄭氏語言偽術辭典裏面，「冇補充」即係臭屎密冚，即係有大把嘢唔見得光。呢嗱，壹傳媒老闆黎智英舊年六四集會上公然以粗口辱罵兼恐嚇東方報業集團記者，並以「×你老母×」、「我實會搵人搞×你」、「我影×咗你嘅相」等言語恐嚇，證據確鑿，但律政司遲遲唔檢控，東方上月底致函律政司提出八條提問，司長亦果然貫徹「經常質問不回覆」嘅作風，拖咗成個星期至Hea覆，通篇都係官腔廢話，東方自然唔收貨，隨即追加七條問題，要求律政司跟進及確切答覆會唔會提出檢控。
今次律政司反應係就係夠快，隔日就有回音，可惜又係答完等於冇答，「就你（東方）的查詢，我們（律政司）已於三月一日作出回覆，我們沒有進一步補充」，咁就算數。今次又係「冇補充」，大家知咩料喇！
喂，律政司上次都肯花心機堆砌幾行文字，帶人遊吓花園，今次直頭睬你都有味，仲有冇再離譜啲？有做過區議員嘅學者就講得啱嘞，政府部門回應議員提問，必定逐條問題回答，斷唔會好似律政司咁，以一堆模棱兩可及簡單嘅文字回覆傳媒查詢。例如係咪有人包庇，調查咁耐係咪人手不足定係其他原因，律政司都有必要逐條回答。須知道，呢單畸士唔係普通刑事恐嚇，記者代表市民採訪，涉及公眾利益，律政司拖吓拖吓當冇件事，叫市民對本港新聞自由、司法公正仲有咩信心？
不過冇計喇，僭建驊帶住原罪上台，心中有鬼，被促落台問責，自然矮人一截，為求自保，佢不惜犧牲法治，無論係放生政治黑金案，抑或係對刑恐記者案零反應，通通都係「大和解」幌子下嘅魔鬼交易。咪畀人睇死，拖吓拖吓，最終咪又係「證據不足」大玩放生把戲。
所以話，「冇補充」即係「唔做嘢」，漢奸黎有司法保護傘罩住，仲唔打橫行咩！