財政預算案啱啱公布，咪睇財爺派糖派到怨聲載道，其實孤寒市民闊佬自己人，淨係律政司一個部門咋，今個年度嘅整體開支預算接近二十三億元，比上年勁升逾四成，到底啲錢使晒去邊？之唔係益晒啲外判洋大狀囉。
律政司洗腳唔抹腳已經整慣姿勢咯，文件顯示，今年最大筆開支係民事法律開支，達到逾十億元，比上年勁升六成二；刑事檢控開支不遑多讓，達八億九千萬元，比前急升三成四；至於訴訟費用就仲驚人，達到五億三千多萬元，暴增近兩倍。律政司話喎，預算大增係因為外判開支及訴訟費用增加，加上要填補職位空缺及開設新職位，總之就係欲使之錢，何患無詞喇。
呢度幾億，嗰度幾億，使錢好似倒水咁款，可惜完全物非所值。大家有眼見，一宗刑事案喺法庭動輒排期一年半載，毫無效率可言，好似佔中案，首批九名被告到家陣仲係拗緊法律程序，不斷拖延嘅結果，自然係訴訟費用大增，加上律政司迷信洋和尚會唸經，請親嘅外援都係身價不菲嘅英國御用大狀，埋單計數唔甘至奇。舉個例子，曾蔭權案由原審到重審，律政司外聘英國御用大律師、本地資深大律師及大律師，使咗一千四百萬元，問你服未。
最弊係大部分外判律師表現水皮，幾乎打親官司都輸，連前刑事檢控專員江樂士都睇唔過眼，話裁判法院定罪率低下，同律政司外判案件畀新紮律師有關。不過計功夫茶話齋，咁都未算衰，最衰係應告唔告、唔應告偏去告。其他唔講，淨講漢奸黎，呢條契弟既係佔中黑手，又係政治黑金金主，但你咪理，律政司唔止唔將佢落鑊，早前仲放生埋一干政治黑金政客，係咪有免死金牌，係咪賣港有獎，仲使問嘅。
都仲未計終院終極放生「雙學三子」呢一筆，判詞講明「公民抗命」適用於香港，即係預告所有佔中搞手又可以甩身；至於漢奸黎粗言辱罵兼刑事恐嚇東方記者，眾目睽睽兼有圖有片，律政司一樣唔做嘢，吹脹。反觀小市民就慘咯，賣塊紙皮、執卷印花都要拉要鎖，呢啲咪係同人唔同命囉。有人就講得啱嘞，律政司一味攤大手板問納稅人攞錢，交唔到貨不特止，仲帶頭破壞法治，直頭充當反中亂港勢力保護傘，咪使旨意立法會批錢吖。
咁又係呀，爾俸爾祿，民脂民膏，一分一毫都必須用得其所，與其將公帑畀律政司浪費甚至助紂為虐，不如用嚟搞好醫療安老，淨係畀錢罕有病患者買藥，都有意義過益洋大狀洋法官喇。