新科垃圾會議員宣誓就任，結果不出所料，兩位反對派最終死死地氣照本宣科，莫講話玩嘢「加料」，連尾都唔敢趷一下。鬼咩，議員薪高糧準津貼多，兼夾時不時有得免費遊埠，食得招積，住得舒適，咁筍嘅工去邊度搵吖！
呢嗱，話口未完又嚟喇。由立法會經濟事務委員會等四個事務委員會組成嘅粵港澳大灣區考察團，下個月將會前往大灣區五個城市作三日兩夜訪問，點知喺傾行程嘅時候，多名議員提出無厘頭之極嘅要求，有人建議去睇深圳交易所，有人問點解唔去廣州長隆野生動物園，更加有議員知道冇得視察高爾夫球場後，深感冇癮而退出，可見喺呢班垃圾議員心目中，所謂考察其實等同「散心」，行程稍為唔啱心水，即刻發老脾反枱，真係唔到你唔服。
不過又難怪班議員咁勞嘈嘅。正所謂着數面前，人人平等，講到出埠考察，議員一個二個鬼打冇咁精神，而且唔豪華唔遠碇唔收貨，每逢組團赴歐美日本「考察」，佢哋例必爭崩頭，甚至試過因為反應太踴躍，連立法會大會都要讓路，反觀參觀本地博物館等本地項目，往往連三人報名下限都達唔到，最終「流團」收場。尊貴議員威慣歎慣，粗粗哋廣東團都照殺已經好畀面，你唔主動體貼，安排桑拿洗腳都算喇，家陣連睇小動物咁愛心爆棚嘅活動都阿芝阿佐，是可忍孰不可忍！
精叻香港人一向相信「有食唔食，罪大惡極」，而垃圾會政棍更將之發揚光大，唔單止自己食，仲同至親好友分食。之前立法會組團出訪以色列，白鴿黨女議員竟然帶埋老公隨行，兩人一齊搭公務車，一齊住同一酒店，擺明將公務考察當成私人玩樂，唔知嘅仲以為有人補度蜜月添。
可能有人會話，學習其他地區先進經驗，使多少少公帑都物有所值，咁諗就太傻太天真喇！垃圾會議員周遊列國，根本只係得個睇字，舉個例子，垃圾會議員夠去過德國取經喇，人哋議會對遲到早退缺席唔投票嘅議員課以罰款，嚴重干擾議會秩序嘅，罰單更加超過一萬港元，再犯再加碼，如果垃圾會一早肯見賢思齊，就唔使剪布剪得咁辛苦喇。
始終都係嗰句︰畫虎畫皮難畫骨，知人知面不知心。咪睇班垃圾會議員平時開口埋口「民主自由」、「人權公義」，實際上千里為官只為財，除咗熱衷「走出去」，垃圾會議員最熱心為自己謀福利，一味要求加薪加津貼，可惜財到光棍手，一去無回頭，有人喺辦公室豪買潮流電子產品，有人甚至喺佔亂期間購買反政府物資，納稅人養狼狗咬心口，你話係咪冤過竇娥吖！