正所謂醜婦終須見家翁。壹淫媒老闆漢奸黎涉嫌辱罵兼刑事恐嚇本報記者，事件拖延超過八個月，律政司一味龜縮零回應，本報忍無可忍，正式去函提出八條提問，例不虛發，戳中晒當局死穴，唔到佢哋繼續扮鴕鳥。
淨係劈頭第一問︰律政司至今仍未作出檢控，是否不合理，已經問到佢口啞啞喇。本報記者被漢奸黎辱罵恐嚇後，第一時間響應「妓協」呼籲，報警備案，而警方亦將案件列作刑事恐嚇案處理，點知之後律政司同警方互相扯皮交波，當時功夫茶已經思疑，會唔會最後又係當冇件事發生，睇依家個勢，雖不中亦不遠矣！
講真，呢單嘢案情好簡單，當日又係公眾場合，幾千幾百對眼睇住成個過程，最緊要係有圖有片有真相，漢奸黎開到聲搵人搞記者，又×人老母個×，齜牙咧嘴，惡形惡相，連蠱惑仔見到都嚇到腳軟。喂，前排某大學學生會頭頭「佔領校園」，粗言穢語兇老師，令對方感到受威嚇，校方喺輿論壓力下最終都要執行家法。家陣記者畀漢奸黎開到聲「搵人搞」，到依家出街都仲係提心吊膽，律政司居然坐視不理，等於正式宣布香港新聞自由玩完！
講到呢度，本報第三問︰是否有人包庇黎智英，答案已經呼之欲出。大家有眼見，莫講話漢奸黎恐嚇記者逍遙法外，佢老哥被指係佔中之亂嘅最大金主及幕後黑手，至今亦冇人敢郁佢一條毛；就連大宅僭建再僭建，執法部門都係闊佬懶理，關人個關，有人有恃無恐，囂張到揚言「唔怕踎監，至怕洗廁所」，家陣知點解喇。
最離譜嘅係，漢奸黎嘅保護傘無遠弗屆，絕對唔止司法咁簡單。早排壹淫媒放售《壹週刊》，雖然最終爛尾收場，但過程中發布訊息仲亂過亂世佳人，不排除有人利用股價波動上下其手，證券界人士強烈要求監管部門介入跟進，保障投資者權益，維護香港國際金融中心嘅聲譽，點知當局又係當耳邊風，唔到你唔服！
至於本報第八問︰早前有同類涉刑事恐嚇的案件，涉案人被起訴，律政司對刑事恐嚇案件是否存在雙重標準？功夫茶亦可以喺度代答。律政司雙重標準就梗嘅嘞，政治黑金案震驚全城，律政司居然以「檢控證據不足」為藉口將金主漢奸黎同一眾收錢嘅政客全部放生，反觀清潔阿嬸執幾張印花就被告到甩褲，法律面前，反中亂港、洋奴漢奸比其他人更平等，就係咁簡單。
咁就難怪律政司遲遲唔敢覆信，心中有鬼吖嘛。嗱，東方八問有根有據，義正辭嚴，律政司休想用語言偽術蒙混過關！