有咩慘得過摺書？答案就係連摺兩次書！壹淫媒老闆漢奸黎繼本周摺埋香港版紙本《壹週刊》後，台灣版下月四日出埋最後一期亦都摺埋唔再出紙本，以反中亂港禍台為己任嘅漢奸黎終於惡有惡報，旗下刊物生得淫蕩死得下賤，抵死！
對於漢奸黎嚟講，香港同台灣版《壹週刊》接連玩完，只係佢多行不義必自斃嘅結果，全屬咎由自取，與人無尤，有傳壹淫媒旗下另一刊物台灣《爽報》亦會於下周一摺埋，若然屬實，可謂天理循環，報應不爽，大快人心。不過作為上市公司嘅壹淫媒，無論係之前嘅賣盤計劃，抑或港、台兩地「摺書」嘅交代，都係訊息混亂，鬼鬼祟祟，不負責任，既唔停牌又唔發公告，做法令小股東無法掌握資訊，構成損失。
其實壹淫媒何止令小股東利益受損，佢哋旗下嘅刊物宣淫販賤，充斥住生安白造嘅報道，多年來荼毒污染香港同台灣兩地市民，近日更加喺嚴肅新聞版面，搵嚟睇相佬穿鑿附會，唯恐天下不亂，做法有違新聞專業。壹淫媒淫賤又低格嘅報道固然傷風敗俗，但漢奸黎打住新聞自由旗號，行公器私用之實，透過旗下刊物為外部勢力做代理人，實踐反中亂港禍台嘅陰謀詭計，無所不用其極挑動社會鬥爭，恐嚇東方記者打壓新聞自由，不遺餘力咁去煽惑年輕人上街聚眾搞事，先係真正嘅居心叵測漢奸所為，亦係令社會元氣大傷嘅元兇。
本來只要政府肯依法公正處理呢種喺背後推波助瀾、嚴重破壞社會安寧嘅幕後推手，問題就會得以解決，不致演化出非法佔中、旺角暴動等亂事，不過特衰政府恐洋懼外，對漢奸黎為首嘅一眾亂港勢力姑息包庇，由政治黑金案到「雙學三子」暴力衝擊政總，通通得以逍遙法外，漢奸黎刑恐本報記者，本報三度去信質詢律政司，律政司一味死拖，唔敢做亦唔敢告，司法保護傘永遠庇佑反中亂港者，睇怕佔中嗰筆都係不了了之，漢奸黎集團既然有免死金牌照住，自然有恃無恐，睇怕大和解未實現前，社會已遭漢奸黎大肢解。
出名契弟嘅漢奸黎連環摺書擺明就係做唔住，難為佢仲死雞撐飯蓋，話轉戰網絡係為將來捲土重來做準備喎，笑死人咩！大眾已經睇穿漢奸黎為外部勢力做走狗嘅真面目，鄙棄壹淫媒多年來嘅偽民主鬥士假面具，更加對漢奸黎為首嘅一眾反中亂港勢力非常不滿，唔止壹淫媒刊物應該通通摺埋，一本不留，最應該摺埋嘅仲有始作俑者嘅漢奸黎本人，咁至啱聽吖！