尋日係一年一度嘅「三八婦女節」，不過生活喺香港嘅婦女都冇咩好值得慶祝，事關特衰政府既冇長遠嘅育兒政策，又懶理要求完善託兒服務嘅滔滔民意，搞到唔少婦女既要返工又要兼顧屋企，身心俱疲，可以話間接被呢個爛政府搞到神經衰弱，冇覺好瞓！
試問仲有咩衰得過特衰政府先？早幾年為咗解決人口老化問題，猛咁叫人「生三個」，要將香港變成千萬人口大都市，仲話鼓勵育兒添，點不知口惠實不至，唔少媽媽都喺網上呻笨，話後悔信錯咗呢個政府。咁又係嘅，一味叫人多啲生育，但根本冇配套政策，就講為剛出世到三歲幼兒提供託兒服務嘅日間幼兒中心吖，服務係嚴重供不應求，輪候長龍隨時仲長過公屋上車，有人試過喺懷孕五個月時已報名，結果等到BB兩歲先輪到位。其實佢都算幸運囉，好多媽媽只能將BB送返鄉下交親友照顧，真係一肚子苦水。
香港普遍工時長、工資低，多數家庭公一份、婆一份都係掹掹緊，好多媽媽諗住生完會有社區託兒服務，自己就可以重返職場，賺取生計，但呢啲通通只係一廂情願。呢，數字冇花冇假，香港現有八萬多名三歲以下兒童，不過資助獨立幼兒中心額淨係得七百幾個咁大把，平均逾一百名幼童爭一個額。又好似元朗區，零至六歲幼兒達三萬六千人，但暫託幼兒服務得三十四個額，問你點分？你話呢個政府係幾咁不負責任呢！
可能有人話，特首林鄭本身係女人，應該知道婦女嘅難處，其實，同遮不同柄，同人不同命，從佢八達通唔識拍卡，連廁紙都唔知邊度買嚟睇，佢根本不知民間疾苦，就講今次財政預算案吖，對託兒服務又係蜻蜓點水，虛應故事。咁就難怪有調查顯示，以十分為滿分，受訪者對社區託兒服務只畀出三點七六分，絕對不合格。
做人難，做女人難，做一名既要返工、又要湊仔嘅女人就更難！更何況喺中國人社會，女性被定義為家庭照顧者，有調查指有一半婦女因為呢個角色感到壓力，睡眠質素變差，影響身心健康，甚至出現抑鬱情況。近年不斷發生虐兒事件，表面睇係家庭悲劇，實際上係政府涼薄，翹埋雙手，埋下禍根，庫房滿瀉，如果攞多少少出來支持婦女，就可以解決到好多問題喇。
有句說話老生常談：「幸福嘅家庭都是相似嘅，不幸嘅家庭各有各嘅不幸。」其實計功夫茶話齋，本港婦女嘅不幸都係出於同一個原因，就係呢個特衰政府太無能、太冷血！