開講有話，老虎不發威，就被人當病貓。本港三日內發生兩宗警槍被搶事件，證明家陣警員就係病貓嘞，相信好多市民同功夫茶一樣想問，警槍輕易被搶，警員自身難保，點有能力保護市民呀？
前日有單躁父用衫架教訓長女嘅畸士，五名警員接報到場調查，期間有人情緒激動，糾纏期間企圖搶走警長佩槍，警長幾經辛苦至保住佩槍，雖然擦傷面部，但都算好彩囉。唔係咩，前幾日又係家庭糾紛，又係五名全副武裝嘅警員接報前往處理，又係試圖制服一個情緒激動嘅醉漢，竟然被人搶去佩槍並連轟三槍，導致兩名警員受傷，你話警方係咪失威吖。
唔講唔知，過去幾年間，企圖搶警槍事件已發生多宗，成功搶走嘅個案亦唔止一次，有人擔心搶警槍會變成傳染病，類似事件會陸續有來，絕對唔係杞人憂天o架。咁點解警槍咁容易被搶？除咗平時訓練唔夠，執勤時警覺性太低，睇怕係同近年警隊醜聞層出不窮，導致形象下跌有關。大家有眼睇，近年警方涉及各式各樣嘅罪案，盜竊、醉駕、喺警署強姦、非禮、砌無辜市民生豬肉、無間道，幾乎乜都齊，甚至仲有警黑勾結添，好似人稱「上海仔」、捲入好多刑事重案嘅黑幫和勝和前坐館郭永鴻，就有高級警務人員包庇，警隊近年被套上「黑警」嘅帽子就係咁解。警隊良莠不齊，自損形象，頻頻被人挑戰有乜出奇吖。
仲有喎，自從佔中一役，「違法達義」謬論流傳，唔知洗壞咗多少後生仔嘅腦，唔少人以挑釁警方為榮，旺角暴亂期間警方被圍毆就係典型。加上港府是非不分，忠於執法嘅警員一再被判刑，反而犯法主腦逍遙法外，大滅警方威風，大長犯法者志氣，結果咪搞到曾經號稱世界一流嘅香港警察，淪為今日被搞事者喊打喊殺嘅目標囉！
話時話，呢幾次搶警槍嘅不過係醉鬼同埋躁漢啫，換作係膽正命平嘅南亞兵團或者係國際恐怖分子，後果簡直不堪設想。唔係靠嚇o架，早前就有一名印度裔恐怖分子失手被逮，佢老哥遙控印度嘅同夥殺警劫獄，救走恐怖組織頭頭，仲犯下洗黑錢、綁架、販毒等驚天大案。試諗吓，如果呢類大案喺香港發生，警方唔倒瀉籮蟹至奇。
一句到尾，連番搶槍事件暴露咗好多問題，警方識得申請撥款購買水炮車、隨身攝錄機嘅同時，好應該深刻檢討如何加強平時嘅訓練，點樣提升番警隊形象，重新贏得市民嘅信任。如果唔係，警方遲早倒退回廉署成立之前嘅「華探長年代」。