晚清名著《二十年目睹之怪現狀》如果換成港澳回歸現代版，怕且啲衰嘢一樣係三日三夜都數唔完。香港嗰筆唔在講，澳門都係一擔擔，淨係起幅防洪牆咋，仲艱巨過起萬里長城咁款，拖足幾年搵舊磚頭睇吓都冇，問你服未。
咪睇澳門年年派錢歌舞昇平，其實金玉其外敗絮其中，舊年八月「天鴿」造成死傷枕藉，暴露由天氣預報到防風基建冇瓣掂，早被指為人禍。最弊呢啲亂象沒完沒了，澳門民生問題根本一塌糊塗，好似內港沿岸嘅水患問題，咁多年來都冇解決過，只要一遇風災雨季必會出現海水倒灌同埋水浸，商戶及街坊叫苦連天，損失慘重，你話澳府官僚係咪大整蠱吖？
可能畀人媽叉得多啩，澳門當局決定優化內港現時「見縫施堵」治標唔治本嘅防洪設施喎，計劃喺媽閣航海學校至林茂塘海港樓起一條全長二點一三公里、高約一點五米嘅半活動式、全活動式及鋼筋混凝土防洪牆，部分地方則利用現有圍牆加建，目標係要抵禦二十年一遇嘅洪水。計劃就有喇，問題係幾時完工先？
有名你叫澳門特拖政府，做嘢食咗成擔豬油就梗嘅嘞，原來整個工程十畫未有一撇，連設計圖則都未有，遑論招標及施工。澳府官僚講到明，今年風季前唔使旨意有防洪牆應付水患，即係叫市民自求多福咁解。以澳府起間離島醫院拖足八年仲係爛地一塊、輕軌鐵路崩潰式延誤通車無期嘅往績觀之，呢幅防洪牆到底何年何月完工，真係天曉得。
話時話，優化防洪牆計劃根本唔係新嘢，早喺四年前「海鷗」襲澳引致大水浸已經提出，仲話翌年可以完工添，點知一拖經年，拖到無影無蹤。正如立法會議員話齋，澳府做嘢一味拖，莫講話家陣連時間表都未有，就算起好都未必頂得順「天鴿」呢啲百年一遇嘅颱風，盞嘥氣嘅啫。
冇計嘞，成個澳門特拖政府由上到下都廢到無倫，莫講話民生基建拖得就拖，即使係紀律部隊一樣冇規冇矩，否則海關點會發生兩次倒掛五星旗鬧劇，同埋無理扣查外國七人醫生團隊令旅客一肚氣吖。最弊係官官相護，徇私枉法，好似前氣象局局長明明因為「天鴿」單嘢孭晒鑊，點知一個屈尾十印印腳咬長糧，吹脹！仲有喎，「天鴿」摧毀嘅公共設施到依家仲係蓉蓉爛爛，停車場、行人天橋重開無期，問你點頂！
嗱，相傳大禹治水都係用咗十三年時間咋，唔知澳門政府起幅防洪牆要用幾多年至埋到單呢？咪畀功夫茶批中，以澳府官僚死拖爛拖嘅戇居作風，隨時十三年後都係得個吉，澳門市民惟有求媽祖保佑，特大洪水千祈唔好咁快殺到呀。