忍無可忍，不必再忍！美國總統特朗普挑戰一中底線，仲殺氣騰騰要對中國發起貿易戰，擺明踩到上心口，北京終於一改過去委曲求全嘅軟弱態度，罕有站起來奉陪到底，外交部強硬表明「一不會怕，二不會躲」，維護國家利益敢於亮劍，咁至係波吖嘛，好嘢！
係人都知，中國近年不斷崛起，令作為世界霸主嘅美國出現危機感，視中國為頭號競爭對手，加上美國中期選舉即將舉行，特朗普為提振民望，展示強硬姿態，中國就慘被祭旗嘞，所以話，今次貿易戰美其名曰懲罰中國「盜取美國知識產權」，其實係欲加之罪何患無詞。早前美國宣布徵收進口鋁材同鋼材懲罰性關稅，矛頭已經係針對中國，今次更加出重手，目標係每年向中國徵收六百億美元重稅，一旦落實，堪稱有史以來最大貿易戰。
特朗普磨刀霍霍，唔通中國再次引頸就戮？非也，正如國家領導人話齋，中國係美國最大貿易夥伴，雙方利益關係密不可分，打貿易戰冇好處、冇贏家。美國係都要尋釁滋事咯喎，係都要攞起大棒亂咁舞咯喎，中國別無選擇，只有針鋒相對，一路奉陪。
講真，過去中國對美國忍得就忍，一味唾面自乾，結果人哋唔領情不特止，反而認為中國軟弱可欺，就講舊年吖，特朗普夫婦訪華受到皇帝式招待，仲拎走二千五百億美元大單，點不知佢返到美國即刻變臉，中國貼錢買難受。家陣北京終於明白一味忍讓換唔到公平待遇，只會令對方得寸進尺，決心唔再做鵪鶉，準備對美國「迎頭痛擊」，簡直大快人心。
係咯，兵來將擋，水來土掩，呢個世界誰怕誰呀。講到呢度，功夫茶不禁諗起香港嘅洋奴漢奸，回歸以來要風得風，要雨得雨，由港府到中央都好似買咗佢哋怕咁款，結果長反對派志氣，滅自己人威風，香港紛紛擾擾，無日安寧，咪就係管治軟弱嘅後遺症囉。
就講林鄭吖，出席反對派黨慶之餘，仲破天荒自掏腰包送三萬蚊贊助，有冇再核突啲呀？唔怪得有人諷刺，反對派「金主」漢奸黎陷入財困，林鄭就接力充當「另類金主」。喂，班友日日搞搞震，又拉布又佔中，家陣無罰有賞，反觀平時幫手保駕護航嘅建制派，林鄭就一個仙都冇畀，「反中亂港有榮無辱，愛國愛港一仆一碌」，就係咁解！
真係諗極唔明，既然北大人連美國都唔怕鬧翻，點解怕咗有外部勢力撐腰嘅反中亂港集團呢？點解任由港府倒行逆施做盡親痛仇快嘅事呢？唔該，趁住打貿易戰，連同洋走狗一齊收拾喇。