天有眼呀天有眼，誨淫誨盜嘅《壹週刊》終於壽終正寢，尋日出埋最後一期正式走入歷史垃圾堆。壹淫媒旗下刊物摺吓一本又一本，家陣得番個爛蘋果吊吊揈，應咗《紅樓夢》書中所云：忽喇喇似大廈傾，昏慘慘似燈將盡。係喎，漢奸黎近日忽然感慨「抬頭暮色蒼茫」，又話「偶有死亡掠影」，睇怕同得番半條命仔嘅壹淫媒一樣，遲早摺得咯。
呢，漢奸黎喺最後一期《壹週刊》撰文，話自己年屆七十，覺得由體力到記性到反應再到求知欲都轉差，步入老年黃昏狀態喎，幾次提到「死」字，但又不忘自我安慰，話正因為年紀大，耐性多咗，睇事物冷靜咗，今次返番壹淫媒主持大局，就係想「以漂亮的姿態復活」，搞番好個「爛攤子」云云，講到尾就係「垂死掙扎」四個字嘞。
漢奸黎有番咁嘅感慨，都可以理解嘅。二十八年前嘅今日，係《壹週刊》嘅創刊日，如今漢奸黎親手結束「親生仔」條命，「生辰變死忌」，白頭人送黑頭人，話唔悲傷就假咯。
之不過咁，早知今日，何必當初！佢老哥出死力反中亂港、宣淫販賤嗰陣，又唔見佢話自己年紀大機器壞？指揮佔中同大搞政治黑金嗰陣，又唔見佢自認人老色衰無心無力？啱啱相反，呢條契弟搞風搞雨不知幾咁落力幾咁亢奮，佔中日日赤膊上陣不特止，金鐘仲設有一個私家王座添，幾巴閉呀。想當日漢奸黎雄心萬丈，諗住逼中央屈服，佢就可以做太上皇指點江山，到頭來事與願違，契弟想創個心，落得慘淡收場咪抵佢有今日囉。
睇到啦，壹淫媒近年先後最少有六份雜誌及報章摺埋，如果以一幢大廈做譬喻，即係本來已經甩皮甩骨，風雨飄搖，家陣《壹週刊》賣盤又失敗，欲做契弟而不得，即係連條屋脊都隊冧埋，成幢大廈四面透風，頹垣敗瓦，試問仲邊有得救吖！
都係嗰句，多行不義必自斃，歷史上個個大漢奸都係殊途同歸，漢奸黎自己知自己事，垂死掙扎都係徒勞嘅咋。唔係咩，壹淫媒年年蝕錢，過去七年半虧損接近十七億元，單係去年上半年已勁蝕一億七千幾萬，擺明流血不止，醫番都嘥藥費，仲妄想死灰復燃，咪呃自己喇。
咁當然，江山易改，本性難移，佢老哥就算剩低最後一口氣，就算肝腦塗地，都會將反中亂港大業進行到底，生物學上都有回光返照現象喇。正所謂，上帝叫人滅亡，必先使其瘋狂，大家睇住壹淫媒表演最後嘅瘋狂嗰陣，唔好忘記準備埋紙船蠟燭，送佢哋最後一程。