唔知係詐傻扮懵，定係好似立法會議員話齋，「活在泡沫，與社會脫節」，港府高官以為個個打工仔都好似佢哋咁，退休後可以優哉游哉咬長糧。
立法會福利事務委員會尋日開聽證會，四十個團體一致狠批，當局聲稱可保障市民退休生活嘅所謂三條支柱係短樁，根本撐唔住，要求盡快推行全民退休保障計劃。
乜嘢係三條支柱？高官話喎，即係綜援、強積金及個人儲蓄。但正如有家務助理話齋，自己冇強積金、冇退休金，連交通津貼都冇份，搞到六十幾歲仲要打工，何來有三條支柱吖。
有工會踢爆，目前全港有二百八十幾萬長者、家庭主婦同兼職工人，根本冇被納入強積金保障，綜援安全網更係殘缺不全，唔好話三條支柱，連半條柱都冇。
先睇吓所謂綜援，查實呢個安全網覆蓋非常有限，嗰啲「Ｎ無」人士通街都係，等嗰個十畫未有一撇嘅所謂關愛基金打救，蚊都瞓、蛇都死啦。呢啲「Ｎ無」人士退休後無飯開、無地方住，政府係咪打算翹埋雙手唔理？
講到強積金，直頭係「短樁之王」，更加靠唔住。港府縮骨兼涼薄，將強積金交畀基金公司管理之後就關人個關，結果賺蝕閣下自理，而且行政費用高到離譜，打工仔死供爛供，到頭嚟淨係養肥班基金經理，退休後隨時得番雞碎咁多，買糖唔甜，買鹽唔鹹，想食過世？諗都唔使諗！有人形容強積金係「天仙局」，真係入木三分。
話時話吖，大部分打工仔根本唔知強積金究竟係點樣運作、點樣投資，事關基金組合同計算方式鬼咁複雜，莫講話普通打工仔，就算專業人士都未必睇得明喇。所以咯喎，打工仔只能夠聽天由命，好彩嘅可以保住本錢，唔好彩嘅隨時血本無歸，你話怎麼辦？
至於高官將市民個人儲蓄列為三條支柱之一，更加係九唔搭八。低下階層餐搵餐食餐餐清，何來儲蓄呢？中產人士就算可能略有盈餘，但住屋及供書教學已經使咗一大截，又有幾多儲蓄呢？當局連市民棺材本都唔放過，咁識計數，不如計埋人哋買股票或者中六合彩贏咗幾多錢吖，笨！
無計啦！呢個政府對市民根本冇承擔，個個高官喺度混日子，三條支柱有乜辦法唔短樁吖。正如有團體批評，政務司司長唐唐條條fing，一日到黑掛住做疑似特首候選人，對人口老化問題闊佬懶理；而財經事務及庫務局局長傻強有時間扮高雅聽音樂會，聽取市民意見就話唔得閒。仲有吖，有人唔係顧住養錦鯉，就係日日等退休，旨意佢哋以民為本，福為民開，餓死都未天光喇。
喂！你班高官就話退休之後唔使憂柴憂米啫，難為好多打工仔手停口停，退休之日就係斷糧之時，你哋又知唔知吖？一句講晒，三條短樁統統靠唔住，盡快推行全民退休保障計劃，速速磅，唔好再兩頭望！