犯法梗係要罰o架啦，如果係治亂世，更加要用重典。就好似你利用六合彩報荼毒內地同胞咁吖，鼓吹賭禍害到人哋家散人亡，理論上應該罰得有咁重得咁重。之不過咁，都話咗淫賤黎有港英餘孽撐腰，所以呢一個淫媒大亨硬係冇有怕，餐餐都會有貴人放佢一條生路。
嗱嗱嗱，又嚟喇。今年六月本報揭發三份港產六合彩報《創富》、《六合皇》及《貼士皇》違規偷改承印人資料，涉嫌違反《本地報刊註冊條例》，負責監管嘅影視處一拖再拖之後先至將案件交由律政司跟進，警方早前終於以「報刊上未有印上承印人名稱及地址」罪名控告三報嘅出版人「創能有限公司」。表面上依法辦事，實際上「一制兩法」，事關由淫賤黎擔任董事嘅承印人公司完全冇事，即係告一間唔告一間，亦即係幕後主腦得到放生。
好明顯，出版人公司只係「雞棚」，係負責頂罪嘅「豬仔」，真真正正大發不義之財嘅承印人公司就逍遙法外。
莫講話幕後主腦絲毫無損，原來連代罪羔羊都可以享受高高舉起、輕輕放下嘅特殊待遇。被告創能有限公司承認三項罪名，你估法官點判呢？每項控罪罰款七百元，合計罰款二千一百元。
嘩！你話判罰係咪輕到難以置信？今時今日通街亂拋垃圾都罰款一千五百元啦，堂堂一間公司犯法居然每罪只罰七百，三罪加加埋埋先至盛惠二千一，唔夠淫賤黎開一支法蘭西高級紅酒啦！
咁就難怪身兼行政會議成員嘅立法會議員劉江華直指罰款偏低，認為法例值得檢討。劉議員仲話，會於下月一日嘅立法會會議之上書面質詢相關部門，要求加強堵截港產六合彩報走私到內地圖利，間接助長賭風，影響社會治安。
計功夫茶話齋，的而且確有必要質詢，一於打爛沙盆問到篤。喂，知唔知黑市六合彩害死幾多同胞呀？傾家蕩產又有，家破人亡又有。最近有一宗慘無人道嘅血案，福州有一個爛賭婆，沉迷六合彩欠下一屁股債，鋌而走險綁架鄰居六歲小朋友，勒索家長三十萬元，到頭來，人哋都已經乖乖獻上贖金嘞，肉參竟然照樣被撕票！
即係咁，香港放生利用六合彩報牟利嘅幕後黑手，等於助紂為虐害死不少病態賭徒以及無辜同胞，好冇陰功o架！
影視處放生淫賤黎真係多到數唔晒，淨係冇耐前之嘛，壹淫媒旗下網站VDO NEXT V壹網一段名為「如何自行檢查乳房」嘅短片，本來已經被淫褻物品審裁處評為第二類物品（不雅物品），影視處竟然以「網站已修改警告字眼」作為藉口，拒絕採取法律行動喎。
犯法而冇採取法律行動固然係有法不依，即使真係提出檢控，你都咪以為會依法辦事。壹淫媒違反《淫褻及不雅物品管制條例》過百次o架喇，冇一次重判，次次都係輕輕罰款一萬幾千了事。
總而言之，如果你話淫賤黎係禍國殃民嘅災星，縱容包庇嘅官老爺就係罪孽深重嘅幫兇！