擾擾攘攘兩個年頭嘅梁展文事件，基本上叫做終於得出結論。
立法會專責委員會發表報告，對於呢一位房屋及規劃地政局前常任秘書長狠狠發炮，直斥梁展文刻意隱瞞事實，不符應有操守，影響公務員聲譽。至於負責審批嘅高官無一幸免被點名批評，包括公務員事務局局長俞宗怡，委員會認為一眾高官處理粗疏，俞局長更加有必要負上最終責任。
之不過咁，俞宗怡似乎幾鍾意戀棧，所以冇話過會引咎辭職。
大家可能會話，喂喂喂，事隔兩年咁耐嘞，唔係好記得到底發生過乜嘢事喎。咁啦，等功夫茶略略重提舊事，幫助大家溫故知新。政府最初出售居屋紅灣半島，買家係新世界發展，主理其事嘅係梁展文；梁展文之後夠鐘退休，一個屈尾十居然加入新世界任職高層，年薪三百萬；高官退休轉戰商場搵真銀，而且係受薪於曾經懷疑得過官老爺鬆章好處嘅私人機構，馬上惹起輿論嘩然；然後就係立法會介入調查，得出一份「遺憾眾官」嘅報告，認為梁展文入職私人機構係一項「延後利益回報」。
舊事講完嘞，有冇乜嘢最新發展呢？當然有啦，第一個發展係梁展文打死都唔肯認錯，發表三千字大作企圖文過飾非，雖然有人話文采有進步，不過邏輯狗屁不通。
至於第二個發展就係咁嘅，立法會專責委員會提出連串建議，包括收緊俗稱「冷河期」嘅高官轉職禁制期，建議首長級第八級官員離職後冷河期由三年延長至五年，並且要求提供與準僱主過往嘅工作關係。
對於延長冷河期，公務員團體有乜睇法呢？非常簡單，極度抗拒。公務員工會聯合會主席梁籌庭話喎，延長冷河期會打擊公務員士氣，唔應該為咗一粒老鼠屎影響成鑊粥，認為新建議影響高級公務員再就業，高官惟有延遲退休，影響各級公務員晉升機會，不利公務員整體發展。香港高級公務員協會主席蘇平治就話嘞，延長冷河期無補於事，對公務員不公平，冇理由唔畀高官有就業自由。
唉，講到呢度，大家應該明白點解當初梁展文入職私人機構嘅申請竟然會得到批准。無他嘅，官僚普遍私心太重吖嘛，一個二個急於退休之後加入財團享受高薪厚祿，理得你有冇必要過冷河吖。正正因為人同此心、心同此理，梁展文嘅申請咪「一條龍長開綠燈」囉，事關今日負責審批嗰個，他日亦有需要照辦煮碗，唔阻人發達等於為自己大開方便之門。
所以話啫，政府一向奉行嘅「高薪養廉」政策其實係搵笨，公務員在位之時薪高糧準福利好，咁又點呢？結果又係繼續官商勾結，又係利益輸送，一個梁展文倒下來，千千萬萬個梁展文爬起身。
計功夫茶話齋，延長冷河期未必足夠㗎，不妨考慮徹底禁止高官退休之後投身大財團，利益輸送嘅問題或者可以稍微改善。