二○一○年「風雲人物」係邊個？雖然話爆料爆到各國政要裙拉褲甩嘅維基解密創辦人阿桑奇係大熱門，不過結果係社交網站創辦人朱克伯格。假如香港有一個「惹火人物」選舉，功夫茶誠意為大家提名一個極有機會勇奪殊榮嘅候選人：上任僅僅三個月嘅私隱專員蔣任宏。
蔣任宏有幾惹火？巴閉咯，架勢咯，未上任已經激嬲全世界，一上任繼續辣全人類，本年度港九新界範圍應該冇乜邊個夠佢咁有雄厚火力，有資格同佢一爭長短嘅大概只有剛剛被捕嘅旺角花園街縱火狂徒。
不如先睇睇上任之後嘅惹火行為吖。身為私隱專員嘅蔣任宏，唔知係咪貫徹凡事列作私隱嘅宗旨，居然以「單一招標」嘅做法聘用一間公關公司，動用公帑二十五萬元代佢四出奔波招呼各路人馬，包括尊貴議員以及民間團體。你知啦，所謂單一招標根本同黑箱作業冇乜分別，一來缺乏透明度，二來缺乏競爭性，全無公平可言。
更加令人火滾嘅係，呢一間受聘嘅公關公司原來係蔣任宏嘅舊相好，佢老哥○三至○六年擔任郵政署署長嘅時候，聘用嘅公關公司正正就係今次嘅同一間。如果你話唔係明益自己友嘅私相授受，睇怕冇乜人會信囉！
民主黨副主席劉慧卿就話嘞，佢喺一次會議同蔣任宏講，私隱專員聘請公關公司根本冇必要，簡直係浪費金錢。諷刺嘅係，嗰次會議就係呢間公關公司安排嘅。
講到呢度，等功夫茶做一個小結，歸納一下蔣專員因乜事幹咁惹火。首先，懷疑黑箱作業；其次，懷疑私相授受；再者，懷疑浪費公帑。
所以話啫，蔣任宏未上任之前出現此起彼落嘅不滿聲音，反對者其實係有先見之明，事關呢一位仁兄確係冇乜資格捍衞香港人嘅私隱。事件要追溯到二○○五年，當時係郵政署署長嘅蔣先生居然喺長沙灣郵局安裝針孔攝錄機監視員工。講得好聽係監視，講得難聽係偷窺，試問一個有侵犯私隱前科嘅「瞥伯」，何德何能出任私隱專員？打個譬喻吖，鹹豬手梗係冇資格做法官審判風化案㗎啦，更加唔應該出任道德重整委員會會長！
之不過話說回來，黑箱作業、私相授受以及浪費公帑呢三家嘢，實在係政府帶頭教壞細路，蔣任宏大概係耳濡目染學壞手勢。大家睇番當初私隱專員嘅遴選過程，同樣缺乏透明度，同樣缺乏競爭性，全無公平可言。所以輿論不斷批評，現時不少退休公務員被安排出任監察政府嘅公職，令相關機構淪為「退休高官俱樂部」。至於講到不受歡迎嘅蔣任宏喺「單一招標」之下履新享受高薪厚祿，當然亦係浪費公帑啦！
講真，聘用公關公司呢一個動作本身已經反映蔣任宏嚴重缺乏自信，企圖透過「政治化妝師」幫佢塗脂抹粉。既然係咁，功夫茶建議退位讓賢算咯，無謂愈描愈黑化出一個醜妝獻世吖！