香港寸金尺土，地皮愈賣愈貴，求其一幅地，郁吓都話值過百億。之但係，地皮點值錢都好，落喺政府官僚手上，唔係沉香當爛柴，就係生人霸死地。
呢，機電工程署總部由銅鑼灣加路連山道搬咗去九龍灣之後，港府有意將騰出嚟嘅空地改建私人住宅，點知搬咗五年有多，呢幅地幾時交吉仲係未知數。機電署話喎，搵唔到合適地皮安置轄下嘅香港車輛維修站。
唔係啩？拖咗足足五年仲未搵到地方搬？呃鬼咩！係人都知，加路連山道呢幅地皮喺正港島黃金地段，同區私人樓宇呎價超過二萬蚊，如果推出嚟拍賣，分分鐘超過一百億元。炙手可熱嘅市區地王，居然被機電署霸住做「車房」，你話係咪敗家吖！
樓市失控，市民怨聲載道，除咗土地供應短缺呢個元兇，原來仲有港府做幫兇，變相囤積居奇，推高地價，令升斗市民望樓興嘆。唔怪得已故美國前總統列根話，「政府唔係解決問題嘅方法，因為政府本身就係問題所在」。冇錯喇，港府就係香港好多問題嘅所在。
機電署仲死撐話，維修站需設喺港島區交通方便地點喎。簡直九唔搭八，銅鑼灣雖然係市中心地段，但經常塞車，如果將維修站搬去遠啲嘅區域，可以慳番塞車時間，豈不是仲方便？話到尾，當局根本就係敷衍了事。
立法會議員就炳得啱嘞，成個港島咁大，港府又有咁多地皮，冇可能拖咗五年都搵唔到合適地方重置維修站。再講吖，呢幅地皮位置優越，繼續做部門辦公室，簡直係浪費公帑。灣仔區議會亦踢爆，當局幾年前已經就地皮劃作住宅用途徵詢過意見，並獲得區議員支持，但之後就冇咗件事。一個維修站拖延成幅地皮發展，當局為求自己方便，影響咗灣仔區嘅重建，更令庫房少咗過百億元收入，擺明倒納稅人米啫！
講開又講，港府懶理地皮有價，浪費珍貴土地資源，早就有前科啦。呢，前北角邨地皮同樣屬地王級，但足足空置咗十年都未落實發展計劃，又唔開放畀公眾使用，一直喺度養蚊，期間只係曾經招租做臨時停車場，簡直係暴殄天物，不知所謂。
而講到浪費土地資源，最典型例子莫過於舊啟德機場地皮，空置咗十幾年，除咗姍姍來遲落實興建郵輪碼頭之外，其餘發展大計仲係十畫未有一撇。
土地資源貴過黃金，港府一啲都唔珍惜，百億地王做車房亦唔肉赤，話到尾，都係因為損失嘅係公帑，有納稅人埋單。話時話，如果呢啲地係高官自己嘅，莫講話五年咁耐吖，五日冇租收，已經喊咁口啦！