街市街道一字之差，意思完全唔同，一個愈擠愈旺，一個愈暢通愈啱。公共街市外面長期有人擺檔阻街，食環署居然翹埋雙手，懶理行人路變街市，睇嚟呢班官老爺要返幼稚園重讀識字班至得咯。
成件事係咁嘅，荃灣楊屋道街市對出街道檔戶違規擺賣同貨物阻街問題幾十年如一日無王管，而且愈來愈嚴重，「好似條路冇人行咁」。唔止市民出入街市飽受困擾，連路邊車站嘅候車乘客都被擠到企出馬路。
咁都得？乜負責街道管理嘅食環署唔見影嘅？唉，講出嚟都冇人信，原來食環署分區辦事處正正就喺街市大樓三樓。檔戶公然違規擺賣咁沙膽，分明喺老虎頭上釘蝨乸啫！
唔提猶自可，提起真係火都嚟埋。弊在食環署不過係隻得把口嘅無牙老虎，違規檔戶根本當佢哋冇到。呢，雖然署方每日都派人周圍巡視，不過得個齋行，見到違規行為最多勸喻幾句就算，好少採取進一步行動。食環署人員一走，行人路又再擠爆。
食環署回應話，發現有人違規會先口頭或書面警告，如果警告無效就會拘控。講到係威係勢，但數字顯示，由今年八月至十月中，食環署人員喺呢個街市一帶一共發出三千二百七十二個口頭警告、一百三十一個書面警告。估吓拘控個案有幾多？原來只得一百三十二宗咁大把，違規同拘控數字根本唔成比例，食環署直頭連無牙老虎都不如。
有立法會議員直斥食環署連自己地盤都睇唔住，咁多舖頭非法擴張營業當睇唔到，係敷衍卸責。亦有荃灣區區議員狂炳食環署執法不力，要求加強檢控，仲建議搵埋警方跨部門聯手執法。唉，出咗事就話跨部門檢討，有鑊齊齊孭啫，要呢班大懶蛇做多啲嘢？盞嘥氣啦。
唔係功夫茶老屈，食環署有名「大懶蛇俱樂部」，員工吞泡蛇王前科多到嚇死人。不務正業，疏忽職守，返工時瞓覺、打波、購物、飲酒、睇戲乜都有。審計署發表嘅衡工量值報告，食環署次次榜上有名，唔係衰呢樣，就係衰嗰樣。最近呢次畀人踢爆一年有超過九萬日病假申請，平均每個員工每年申領近九日病假，直頭可以改名做「最孱仔蛇竇」。講真，平時懶到出汁，郁吓就請病假有乜咁奇吖。
大家仲記得嗎？前排本港爆出七年嚟首宗本地登革熱個案，食環署被揭發監察蚊患系統甩漏處處，形同虛設。署方為咗補鑊，計劃倣效海灘扯紅旗做法，一旦某區蚊患指數到達嚴重水平就扯「蚊旗」，顯示登革熱警示級別，結果畀市民笑到面黃。
計功夫茶話齋，食環署乜都懶做，索性乜旗都唔扯，淨係扯白旗，無論見到違規阻街檔戶，定係蛇蟲鼠蟻飛蚊，即時舉手投降搞掂！