政府計錯數都唔係乜嘢新聞咯，尤其係最近再次粉墨登場拍攝宣傳片，出鏡呼籲市民發表意見等佢撰寫新一份財政預算案嘅曾俊華，佢老哥計錯數簡直係家常便飯，而且唔係細眉細眼嘅小便飯，分分鐘講緊幾百億銀上落嘅大便飯。問題係，計錯數去到乜嘢程度呢？
講開又講，身為財政司司長嘅鬍鬚曾話自己唔係「視帝」，拍宣傳片拍到好緊張，查實計功夫茶話齋，今年嘅宣傳片算係有啲啲咁多多進步，起碼唔係好似舊年咁，堂堂財爺居然飾演偷聽市民講嘢嘅攝青鬼，算係不過不失o架喇。
言歸正傳，安永會計師行幫政府計過數，今個財政年度盈餘應該會介乎六百二十一億至七百零一億元，遠勝政府原本預計嘅二百五十二億元赤字。亦即係話，正負相差九百幾接近一千億，鬍鬚曾計錯數嘅程度都咪話唔誇張。
庫房水浸嘅原因好簡單，股市暢旺吖嘛，樓市飆升吖嘛，印花稅收入已經十分和味，再加上賣地成績理想，財政狀況冇可能唔係扭虧為盈。安永同時又預計，政府嘅財政儲備將會增加至五千九百億元左右。除咗財政儲備之外，外匯基金亦錄得六千零四十億元龐大淨盈餘。兩者相加，香港嘅總儲備超過一萬一千億，非常、非常、非常之咁肥仔！
好嘞，政府有錢咁又點呢？正所謂，官富民窮，香港家陣有過百萬身處貧窮線以下嘅草根階層，唔使功夫茶多講喇啩，梗係開倉派糖紓解民困啦！
安永唔止計數叻，提出嘅意見都相當有益有建設性㗎，佢哋嘅建議包括：政府撥出一百七十億元，向受通脹影響嘅市民發放即時援助金；向月薪不足一萬元嘅強積金戶口注資六千元；將稅階由四萬元擴闊至四萬五千元，並且提高供養父母嘅免稅額增至應課稅款三分一；首次置業人士購買三百萬元以下物業，可獲豁免印花稅等等。
冇錯，政府絕對有能力而且有義務紓解民困，問題係守財奴性格一時三刻有冇辦法改善呢？紓解民困會唔會又變成小恩小惠甚至有得睇冇得使？
就好似嗰個剛剛推出嘅「鼓勵就業交通津貼計劃」咁吖，表面上似乎幾好，實際上搵笨到極。根據呢個計劃，無論是否需要跨區工作，只要符合收入及資產限制，每月做夠七十二小時就可以申領六百元津貼。搵笨嘅地方係限制過嚴，以三人家庭為例，每月總收入唔可以超過一萬二千元，即係平均每人月入不得超過四千銀，你話嘞，申請條件係咪太苛刻？
計功夫茶話齋，孤寒成癮呢家嘢係絕對唔要得嘅，你知啦，當一個政府愈來愈有錢，而窮人大軍愈來愈燶丁嘅時候，往往就種下隨時一發不可收拾嘅禍根。古往今來但凡人民冇飯食，而官老爺又朱門酒肉臭，十居其九就會產生不堪想像嘅後果，輕則炒蝦拆蟹，重則七國咁亂。
財爺呀財爺，好心戒一戒守財奴性格啦，人哋煙癮毒癮都戒得甩，冇理由孤寒成癮戒唔甩。總而言之，既然水浸庫房，從速開倉派糖！