樓宇價格貴到飛起，蝸居一族滿肚怨氣，所以要求政府出招壓抑樓市嘅聲音不絕如縷。本來呢，政府係有出招嘅，只不過大部分係不痛不癢嘅花招咁解啫。到咗今年十一月十九日，政府終於出重手、落重藥，財政司司長曾俊華忽然之間宣布推出一系列徵收額外印花稅措施，例如半年內轉手即按成交樓價抽重稅百分之十五，另外又收緊銀行按揭成數，藉此加重炒家負擔。
好嘞，額外印花稅辣招一出，對於壓抑樓市有冇用呢？計功夫茶話齋，有用無疑係有用，不過略嫌「過分有用」，因為沙塵滾滾殺錯良民，不但嚇退炒家，而且殃及用家。由於政策急就章，事前考慮不周，事後補鑊不力，結果導致添煩添亂。簡而言之，急推額外印花稅，財爺好心做壞事。
呢嗱，大家不妨做一個假設，身為業主嘅閣下突如其來有必要江湖救急，又或者不幸患上惡疾等錢使，走投無路之下本來唯一嘅選擇係賣樓套現，試問額外印花稅係咪會搞到你連賣樓救急都行唔通？喂，唔係個個業主都係炒家，好多人係無辜㗎！
新措施最令人無所適從嘅係生效日期。曾俊華十一月十九日宣布新措施由十一月二十日開始生效，當時有記者提問，十一月二十日之前簽訂臨時買賣合約，會唔會受到新措施影響？鬍鬚曾嘅答案係「明天起才計算」。按照一般正常人嘅理解，咁即係話只要十一月二十日之前簽咗臨時買賣合約，之後再簽正式買賣合約都冇問題啦。
好多人都係咁諗，包括長實地產投資董事郭子威，喺微博發放相關訊息。哈，死得佢吖，原來全人類被曾俊華跣到一仆一碌，事關政府後來話喎，臨時買賣合約係冇約束力㗎，如果十一月二十日之前冇寫明「必買必賣」，咁就受到新措施影響㗎喇。即係咁，財爺誤導全世界，「郭子威事件」明顯食死貓。
講到無所適從，淨係額外印花稅應該由邊個負責已經含混不清，日後睇怕會引起不必要嘅爭拗。關於呢一個問題，功夫茶有必要同大家介紹一下背景資料。其實一直以來正常印花稅都冇明文規定應該由買家定係賣家負責，只不過約定俗成「買家支付印花稅」。喺正常情況之下原本問題不大，但係家陣係非常情況喎，新措施係變相嘅懲罰，理論上應該懲罰既得利益者，即係賣樓賺錢嘅一方，如果仍然由買家支付額外印花稅，會唔會本末倒置呀？所以咯喎，有政黨要求政府訂明額外印花稅由賣方全數支付，絕對合情合理。可惜吖，官老爺至今依然處於撞聾狀態，硬係當你發噏風。
唔好以為功夫茶以及平民大眾唔夠聰明，無法理解曾俊華壓抑樓市嘅招數，事實上連最專業嘅律師會一樣摸不着頭腦，要求當局盡快釐清受新措施影響交易嘅確實定義。
計功夫茶話齋，樓市冇錯係要壓抑，樓價的確係要平穩，之但係你冇可能好似蠻牛一樣橫衝直撞吖嘛，更加唔應該以混淆不清嘅訊息誤導市場。
好心曾俊華啦，唔好再添煩添亂，馬上發放清清楚楚嘅指引，更加有必要豁免急需賣樓嘅特殊案例，否則又係怨聲載道㗎咋！