俗語話，扭計嘅細路有糖食，原來一啲都冇講錯。呢，專同港府唱對台嘅香港電台，又獲當局派糖嘞，果然係愈墮落愈快樂。
港府尋日煞有介事咁交代港台「最新發展路向」，唔聽猶自可，一聽笑爆嘴。當局就改革港台又搞「諮詢」、又做「檢討」，兜兜轉轉咁多年，到頭嚟原地踏步，唯一嘅「新意」就係大開水喉，增撥資源，當然，一切支出仍然由納稅人埋單。
當局對普羅市民斤斤計較，一毛不拔，對港台出手就鬼咁大方，有求必應。呢次除咗會增加經常性開支，發展數碼服務，落實撥地興建新廣播大樓，仲會恢復招聘公務員，加開一個副處長同一個總監職位。
仲有吖，港府除咗會撥款畀港台製作高清廣播，另外會撥款四千五百萬元設立所謂社區廣播參與基金。港府出手闊綽，港台梗係笑納啦！
講真，如果港台真係有存在價值，有發展潛力，對香港有貢獻，增撥資源無可厚非。弊就弊在港台一貫打着「編輯自主」旗號，當正自己係無王管嘅獨立王國，想點就點，為所欲為，同市民嘅期待背道而馳，成為納稅人嘅「負資產」。
多年來，港台管理不善，帳目不清，濫用公帑、詐騙公帑醜聞從未斷過。審計署曾兩度揭發港台行政紊亂同「大花筒」，廉政公署更多次拘控港台員工。正所謂，上樑不正下樑歪，○七年七月，前任廣播處長朱培慶畀人拍到攬住艷女行街，全城嘩然。呢個當初大嗌「撐撐撐撐撐」港台嘅高官，卒之自己都撐唔住，要提早退休。過咗幾個月，廣播處助理處長張文新又涉嫌醉駕被捕，畀法庭判罰款及停牌。
比醜聞一籮籮更甚嘅係，港台作為政府部門，食納稅人俸祿，居然成日同港府唱對台戲。陰陽怪氣，冷嘲熱諷，為港府施政添煩添亂不特止，甚至做埋國際反華勢力嘅應聲蟲，淪為反對派嘅言論平台。
正因為港台烏煙瘴氣，醜聞多多，港府焗住做咗場檢討騷，但搞咗一大輪居然係原地踏步。港台唔止逃過殺台命運，維持政府部門地位不變，而且仍然享有「編輯自主」繼續做山大王，仲獲得增撥資源「重賞」，直頭係因禍得福喇。
改革港台擾攘多年，耗費大量人力物力，結果管理冇改善，問題未解決，節目質量更加冇提高。整頓愈整愈亂，納稅人仲要付出更大代價，計功夫茶話齋，港府根本就係玩假檢討、真縱容，做場大龍鳳嚟愚弄市民。有議員質疑增設副處長係為咗實港台，但究竟唔得實，真係天曉得！