沉迷賭博家破人亡，呢條道理唔使多講喇啩，小學生都識啦。不過可惜吖，唯利是圖係好多人嘅處世哲學，所以奸商就會利用港產六合彩報鼓吹賭風，從而賺盡不義之財。至於奸商嘅好朋友就係私梟，佢哋會定時定候將港產六合彩報走私北上，一來禍國，二來殃民，造成遍地開花嘅賭博文化，形成一條涉及款項估計超過二千億元人民幣嘅食物鏈。即係咁，莊家做大鱷，賭仔做點心。
情況惡劣成咁，同胞受害極深，立法會議員劉江華睇唔過眼，質詢保安局打擊及堵截六合彩報走私活動嘅跟進情況，你估保安局有乜嘢回應吖嗱？等功夫茶一字不漏原文照錄畀大家鑑賞鑑賞：「至於因未有把『六合彩報』列明在艙單上而輸出有關物品往內地的案件，香港海關在今年首十個月處理了兩宗個案。香港海關會繼續按《進出口條例》（第60章）的規定嚴格執法。」
嗱嗱嗱，唔係你睇錯呀，亦唔係功夫茶寫錯，海關真係十個月先至處理兩宗六合彩報走私案咁大把，平均五個月一宗，你都咪話唔神奇！
既然人哋日日夜夜走私六合彩報北上荼毒民眾，重災區係廣東省一帶，點解處理個案會少得咁可憐嘅呢？呢家嘢，咪叫做助紂為虐囉，任得幕後主腦逍遙法外。只不過功夫茶有一個問題想請教保安局，既然打擊走私活動放軟手腳，萬一有人喺六合彩報夾雜大量反中亂港嘅刊物，譬如話煽動顛覆國家政權，又或者鼓吹台獨、藏獨以及疆獨，咁又係咪照樣大開綠燈呀？北大人怪罪落嚟，呢隻鑊邊個孭先？
講到助紂為虐咯喎，不得不提似乎擁有「無限次數放生特權」嘅淫賤黎。好似今年六月咁吖，本報揭發三份港產六合彩報《創富》、《六合皇》及《貼士皇》違規更改承印人資料，涉嫌違反《本地報刊註冊條例》，負責監管嘅影視處將案件交由律政司跟進，警方早前終於以「報刊上未有印上承印人名稱及地址」罪名控告三報嘅出版人「創能有限公司」。表面上依法辦事，實際上一制兩法，告一間唔告一間，事關由淫賤黎擔任董事嘅承印人公司完全冇事，幕後主腦得到放生。
香港有香港把關不力，內地有內地官商勾結，港產六合彩報源源不絕禍國殃民，神州大地特別係廣東省一帶嘅貪官污吏又包庇放縱，導致人間慘劇不知凡幾。最無辜嘅係受到牽連嘅小朋友，福州有一個爛賭婆娘沉迷六合彩欠債纍纍，居然綁架鄰居六歲小朋友勒索家長三十萬元，贖金已經收到㗎嘞，肉參竟然照樣撕票！
立法會議員王國興批評保安局對有關走私六合彩報嘅回應太輕描淡寫，完全迴避問題，有推卸責任之嫌。計功夫茶話齋，王議員嘅批評已經十分客氣，面斥不雅直情可以咁講，港粵兩地政府直情淪為賭禍害人嘅幫兇！
所以話啫，反中亂港有錢途，愛國愛港冇運行，正義傳媒真係做唔過，改行學似淫賤黎咁樣誨淫誨盜冇咁嬲！