十年生死兩茫茫，不思量，自難忘，千里孤墳，無處話淒涼……
咦，搞乜鬼功夫茶忽然之間傷春悲秋？無他嘅，今日十二月一號適逢強積金推出獻世十周年，有感而發咁解啫。學柴九話齋，人生冇幾多個十年o架咋。
縱使相逢應不識，塵滿面，鬢如霜……
十年人事幾番新，強積金十歲生日應該慶幸「老有所養」呢，定係怨恨「老無所依」？不如聽下「爭取全民退休保障聯席」點樣講吖。
呢個由七十五個民間團體組成嘅聯席，認為強積金過去十年積存嘅弊病有目共睹，民意清楚反映強積金不能保障退休生活。所以咯喎，聯席提出兩個要求，一：設立跨部門小組，盡快設立全民退休保障及進行公眾諮詢；二：全面檢討強積金制度，並就強積金成效問題諮詢公眾。
呢嗱嗱嗱，批評強積金冇料到嘅聲音仲有好多好多o架，例如職工盟咁吖，羅列出強積金十宗罪，主要罪狀包括：僱主可以利用強積金供款抵銷遣散費或者長期服務金；受託人收取高昂行政費用，蠶食僱員退休保障；幾十萬家務助理以及部分散工無法納入強積金計劃。
冇錯，強積金弊病的而且確有目共睹，最簡單可以咁講，你認為你退休之後揸住一百幾十萬夠食過世咩？大家要記住，香港人嘅平均壽命大概係八十歲，假設你六十歲退休，即係仲要「坐食山崩二十年」。如果你冇其他積蓄，單靠強積金養老，平均每個月只有少得可憐嘅幾千銀。喂喂喂，呢條數仲未計通脹率，到你退休嘅時候幾千銀或者淨係夠你一日食一碗白粥o架咋！
至於複雜少少嘅問題，就係銀行同保險公司等等受託人收取高昂行政費用。受託人平均收取強積金資產嘅百分之二，以現時三千四百幾億總資產計算，每年掠水六十五億元，絕對唔可以話唔係暴利。學者計過數o架喇，過去五年強積金保證基金平均回報率係百分之二點二，但係收費竟然高達百分之二點三六，簡直同一隻吸血嘅蚊冇乜分別。唔好忘記，即使受託人發雞盲幫你投資失利，佢哋照樣收錢o架，幾無良呀！
所以話啫，現行強積金制度確係千瘡百孔，靠佢養老如無意外就好似一代文豪蘇東坡嘅千古名句所講：生死兩茫茫，無處話淒涼。
照咁講，「爭取全民退休保障聯席」所提出嘅公眾諮詢，應該朝住邊個方向研究呢？計功夫茶話齋，不如朝住呢一個方向啦，清拆重建強積金，設立一個真真正正為市民大眾提供老有所養嘅退休保障。如果唔係咯喎，十年又十年，日後滾存到百幾二百萬個臨老唔過得世嘅公公婆婆，激動起上嚟一人一篤口水都浸死你啦！
咦咦咦，咪住先，好似話連積金局主席自己都有意見，承認強積金真係無法惠及全民。既然係咁，麻煩積金局主席好好檢討，有必要嘅時候自拆招牌，置諸死地而後生吖嘛！