上個禮拜喎，適逢國際長者日，幾十位公公婆婆山長水遠去到政府總部請願。因乜解究日暮黃昏嘅老人家仲咁猛火氣呢？事關特區政府對於長者嘅照顧確係少得可憐，醫療福利固然係得雞碎咁多，連退休保障都乏善足陳，個個擔心臨老唔過得世。既然老來無依，當然據理力爭。
你可能會話，喂，咪住先，香港家陣咪有強積金囉，唔可以話退休保障乏善足陳喎。如果你有咁嘅睇法，功夫茶唔會認為你無知，只係覺得你應該去做官，因為只有官老爺先至會食米唔知價，更加懶理民間疾苦。講真吖，現行強積金制度千瘡百孔，靠佢養老怕且買棺材都要走數。
再冇耐之前喎，連前高官王永平都忍唔住出聲。喺一個爭取全民退休保障論壇裏面，王永平直指強積金制度未能全面保障市民，其中一大問題係管理費過高。王永平建議金管局加入強積金受託人行列，不收管理費之下協助市民投資，並且保障一定回報，藉此向銀行同保險公司施壓，迫使佢哋提供平靚正服務。
今年十二月一日就係強積金推出十周年紀念，勞工團體梗係趁機贈興啦，不過唔係送上生日蛋糕，而係羅列十大罪狀。根據職工盟嘅講法，強積金嘅十宗罪主要包括：僱主可以利用強積金供款抵銷遣散費或者長期服務金，蠶食僱員退休保障；受託人收取高昂行政費用；幾十萬家務助理以及部分散工無法納入強積金計劃。由於罪狀有十項咁多，請恕功夫茶唔為大家逐一介紹。
不如咁吖，集中睇睇連王永平都覺得好有問題嘅管理費。按現行制度，銀行同保險公司其實食水相當深，平均收取強積金資產嘅百分之二，以現時三千四百幾億總資產計算，每年掠水就係六十五億元，肥仔到呢，簡直褲都着唔落！
大家千祈唔好忘記，百分之二管理費係「賺又收、蝕又收」。假設你嘅強積金投資賺到錢，你可能唔介意受託人扣你百分之二作為打賞，之不過咁，萬一你係地獄黑仔王投資失利，甚至乎好似金融海嘯期間搞到損手爛腳，佢仲話嚟收你百分之二管理費，你會唔會激氣到想兜口兜面掟隻鞋畀佢歎？
有學者計過數，過去五年強積金保證基金平均回報率係百分之二點二，但係收費竟然高達百分之二點三六。換言之，打劫紅毛鬼，進貢法蘭西，打工仔賺埋賺埋夠錢買粒糖，諗住返屋企慢慢吮啦，點知畀人攔途截劫一口吞咗，仲要咬埋你手指一忽肉。
所以咯喎，職工盟要求政府盡快展開全面及廣泛檢討，正如佢哋嘅口號話齋，強積金漏洞多，快改革不容拖！
十年人事幾番新，強積金推出十年居然令人無法安心，都算係世間罕見嘅異數咯。連行年六十有二嘅王永平都話，一生為香港盡力，老來得不到關顧，政府愧對長者。
人人都會老，高官唔例外，如果一眾高官唔想自己日後山窮水盡買棺材都要走數，認真檢討強積金之類嘅退休保障啦，唔該！