旺角花園街連環縱火案發生近一個禮拜，警方嘅調查好似老鼠拉龜咁，未有任何進展，縱火狂徒繼續逍遙法外。最令人擔心嘅係，狂徒食過翻尋味，隨時執多劑，咁就該煨咯。尋日，警方先至姍姍來遲公開案發當日閉路電視拍低嘅片段，希望市民提供線索，協助緝拿縱火狂徒歸案。
講起今次連環縱火案，唔止為本港治安敲響警鐘，簡直就係明剃警方眼眉。短短半個鐘之內，旺角街頭三處起火，燒咗近百個排檔，造成七人受傷，如果話事件唔涉及生意糾紛同私人恩怨，咁即係擺明挑戰警方喇。
其實，警方畀人剃眼眉都唔係第一次嘅喇，花園街攤檔商會踢爆，過往亦曾發生過多宗縱火案，但未有一單破過案。仲有吖，過去一年幾，本港多次有腐蝕性液體從天而降，造成過百人受傷，警方總共懸紅百幾萬元緝兇，但除咗涉嫌喺銅鑼灣掟鏹水彈嘅疑犯落網，另外幾單喺旺角、廟街同深水埗發生嘅同類案件，鏹魔依家仍然逍遙法外。執法部門廢成咁，眼眉畀人剃完一次又一次，又有乜嘢出奇吖。
講真，鏹水彈影響範圍始終冇咁大，殺傷力有限，相比之下，鬧市縱火後果就嚴重得多喇。呢次好彩發現得早，如果火乘風勢，燒完排檔再燒埋後面嘅樓宇，分分鐘成條花園街燒通頂，造成嘅人命同財產損失將難以估計。
無論鏹魔定火魔，都係香港人嘅公敵，當局固然唔能夠掉以輕心，一定要全力緝兇，市民亦應該提高警覺，盡量提供線索畀警方破案。話時話，避免悲劇發生，關鍵係一個「防」字，防患於未然，狂徒就唔可以咁輕易得手。
講到預防，除咗靠市民自覺，政府角色更加重要。只可惜，當局呢方面嘅表現實在太令人失望喇。好似對付鏹魔咁，有關部門做嘢後知後覺，賊過興兵，敷衍了事，唔講唔知，目前本港至少仲有幾百幢大廈既冇安裝鐵閘，亦冇安裝天眼，十足十冇掩雞籠咁，唔出事至奇。
同樣令人擔憂嘅係，唔止花園街危機四伏，同樣排檔林立嘅深水埗鴨寮街、北河街、油麻地廟街及銅鑼灣渣甸坊等，一樣係「火燒連環舖」嘅高危地點，附近根本冇即時滅火設備，有起事上嚟，就算商戶想自救都無能為力。
呢，花園街縱火案之後，本報記者喺鴨寮街發現，兩邊超過四十幢舊式樓宇只有唔到四分之一有消防入水掣，其中有啲已經滿布蜘蛛網，有啲木蓋根本打唔開添。而消防水栓主要喺橫街轉角位，隨時因為「遠水難救近火」釀成悲劇。
正所謂不怕一萬，最怕萬一，聖誕及新年將至，如果鏹魔、火魔齊齊玩嘢，樓上掟鏹彈，樓下玩縱火，香港隨時爆大鑊。嗱，警方唔想再畀人剃眼眉，唔該加多幾錢肉緊，快快趣趣將兇徒緝拿歸案喇！