飲食集團大家樂剋扣員工飯鐘錢事件搞到街知巷聞，「罷食大家樂」一呼百應，嚇到冇膽得罪顧客嘅大老闆當堂腳仔軟，收回成命唔敢再剝削員工賺到盡。呢件事其實仲有一段插曲，自由黨嘅田北辰由於企喺員工一邊，睇唔過眼無良僱主太刻薄，所以同「為商喉舌」嘅富貴黨友面左左，水火不容之下最終仲要退黨。
大家樂係咪太刻薄員工呢？當然係啦，不過稍稍值得安慰嘅係，無良僱主未算最無良，皆因有人比佢更刻薄。
呢嗱嗱嗱，好似食環署咁吖，職工權益工會揭發，原來該署剝削員工嘅手法尤勝大家樂。食環署有九千幾名員工，兩成係文職白領，八成係戶外藍領。假如你係白領，恭喜你嘞，你一來可以坐喺辦公室歎冷氣，不必忍受好天曬落雨淋嘅苦況，而更加重要嘅係，你每周只需工作四十四小時，每日有一小時有薪用膳時間。
萬一你係食環署嘅藍領員工咁又點呢？弊傢伙咯，你每周工作時間係五十一小時，每日有一粒鐘食飯時間，不過係無薪嘅。換言之，食環署歧視藍領，剋扣勞動工作者嘅飯鐘錢。
大家可能會話，同樣係剋扣飯鐘錢啫，無良程度頂多半斤八両，冇理由話食環署比大家樂更刻薄喎。唉，講古唔好急於駁古，功夫茶未講完㗎。
好嘞，假設你係食環署轄下外判商嘅廉價勞工，你估你會有乜嘢待遇吖嗱？長更工人每日工作十小時，一小時用膳時間係無薪嘅；短更工人每日工作六小時，莫講話冇飯鐘錢，連食飯時間都冇，如果你肚餓得滯，好似做賊咁偷偷食一塊餅乾而唔好彩被發現，你大大大大大鑊嘞！罰款八百五十七元！
你知啦，都話係廉價勞工咯，薪金唔慌高得去邊，罰款八百幾銀隨時等於你白做幾日。你話嘞，係咪無良到極？功夫茶一定唔反對你形容為乞兒兜 飯食。
用膳時間不計薪金固然係剝削員工嘅無道行為，其實仲衍生另一個嚴重問題。○五年喎，食環署有一名水車司機，泊好架車諗住去食飯啦，點不知被一輛汽車輾過腳面，導致右腳尾趾碎骨。既然係工作期間受傷，正常嚟講應該得到工傷賠償。哈，死得佢吖，佢老闆話喎，由於出事嘅司機唔包用膳時間，所以走去食飯途中受傷係唔會受理嘅，冇工傷賠償㗎。
簡單咁講，食環署對待藍領員工已經刻薄，對待外判工人更加無良，任由外判承辦商巧取豪奪。
話時話，點解食環署轄下會有咁多外判工人嘅呢？呢一個係歷史遺留落嚟嘅問題咯，事關政府經常被批評架構臃腫冗員太多吖嘛，為咗完成「公務員瘦身」嘅偉大任務，官老爺咪度出一條凡事外判嘅聰明笨計囉，表面上公務員架構精簡咗，實際上公帑開支冇乜點變，只不過錢畀咗外判商咁解。
計功夫茶話齋，唔係教你黑心，之不過如果你覺得自己嘅良心沖咗落坑渠而又等錢使，不妨考慮做一做食環署嘅外判商，幾盞鬼㗎！