唔經唔覺，副學士已經存在咗十年。副學士課程由最初每年收生二千至五千個，急速增長至現時超過二萬五千個，你都咪話發展唔蓬勃。
副學士到底係乜東東呢？簡單咁講，呢家嘢係老懵董時代嘅「教育政策八萬五」，為求人人有書讀，無中生有副學士。由於副學士係香港獨創嘅新生事物，所以基本上係非常之咁騎呢，譬如話，你辛辛苦苦交足學費讀完副學士課程畢業嘞，你未必可以升上大學，亦都未必可以搵到工作，事關你嘅學歷未必得到認可。
好咯好咯，還得神落！大學教育資助委員會經過兩年籌備之後，終於發表高等教育檢討結果，提出八間大學要將資助學位及自負盈虧嘅副學士課程「分家拆帳」，交由新成立嘅委員會監管，杜絕院校以公帑補貼自資課程；另外，副學士課程同大學之間可互認學分，從而「打通經脈」，令副學士可以順利銜接各間大學。
教資會主席史美倫係咁講嘅，施政報告已預告會將銜接學額由二千個加至四千個，教資會建議為整個專上教育體系設立學分累積及轉移制度，方便副學士升學。
對於專上教育質素，教資會提出三重監管，包括首設可左右政府資源分配嘅專責委員會以及專責監管機構，引入統一質素保證，並且要求教育局局長負起統籌監管重任。
咦咦咦，弊傢伙，功夫茶忽然之間心跳得好厲害，你話要求教育局局長負起統籌監管重任？呢鋪死得啦，事關教育局自身難保，局長自己睇怕都要接受再教育，邊有能力去監管副學士等等專上教育質素呀！
嗱，唔係功夫茶老屈㗎，審計報告白紙黑字講到明，由教育局負責監管嘅直資學校問題多多，百分之九十以上涉嫌違規。違規動作多籮籮，有人扮窮加學費，有人買樓又買股，總之就係帳目混淆不清。更加令人啼笑皆非嘅係，有人踢爆教育局對於直資學校嘅行為一直知情，只係由始至終唔覺得有問題，等到審計報告發炮之後，局長孫明揚居然使出軟皮蛇縮骨大法，口口聲聲認低威咁話，教育局冇牙力！
喂，如果教育局真係冇牙力去監管直資學校，咁又有乜牙力去監管副學士呀？何德何能杜絕院校以公帑補貼自資課程呢？大家必須留意，大學開辦副學士課程係自負盈虧嘅，即係收咗學費有錢賺就自己落袋，如果以公帑補貼，即係搵納稅人笨。
計功夫茶話齋，副學士冇錯係要監管，而且大有必要納入正軌，唔好等一大班小朋友讀完書畢業前路茫茫，之不過咁，如果教育局庸碌無能，咁就弊一弊都冇咁弊，一不小心又係誤人子弟！
咁啦，你想好好監管副學士吖嘛，首先搵人好好監管教育局！