咦咦咦，奇怪嘞，大名鼎鼎人稱李漢奸嘅民主黨創黨主席李柱銘，霎時之間唔認係漢奸？怪到好似幻海奇情咁，莫非係火星撞地球嘅凶兆？打個譬喻吖，吳三桂竟然唔認引清兵入關，你話奇唔奇先！
眾所周知啦，李漢奸一直唔抗拒認做漢奸，而且認到不知幾高興，○三年留下擲地有聲嘅千古名言：「你話我做漢奸，我日日做漢奸，有需要時做漢奸。」因乜事幹今天的我打倒昨天的我？點解唔繼續賣國求榮、認賊作父？咁失常嘅表現如果係因為燒壞腦，功夫茶建議病向淺中醫，早啲求診，早啲安心。
尋日喎，李漢奸接受電台訪問，竟然話畀人叫漢奸係好大件事，反問：「我憑乜資格出賣國家？」跟手就話鬧佢係漢奸嘅人無理取鬧，要求「拿出證據來」。
諗諗下，未必係燒壞腦，李漢奸一係患咗現稱腦退化症嘅老人癡呆，一係患上忽然謙虛症候群。講到出賣國家嘅資格，李漢奸認咗第二，冇人敢認第一。如果真係要拿出證據來，簡直係輕而易舉啦，等功夫茶係咁意執番幾件陳年舊事，嘗試刺激一下疑似病人嘅記憶。
李氏賣國金句舉例如下——
一九八八年：「如果香港繼續做一百年英國殖民地，我想很多人認為是最好的。」
一九九五年：「敢於當殖民主義的走狗。」
一九九九年：美國導彈擊毀中國駐南斯拉夫大使館，當時仍然係議員嘅佢喺立法會替美國狡辯：「只是誤炸。」
呢嗱嗱，正正係九九年呢一劑肉酸到唔恨嘅反骨事件，奠定李漢奸一世英名，從此確立賣國求榮嘅江湖地位，直情係無人能及嗰隻。跟住落嚟嘅一連串漢奸行為，睇怕都唔使浪費口水再介紹喇啩。總而言之，李漢奸經常游走於歐美各國「述職」，不斷唱衰中國同香港，亦即係婦孺皆見嘅反中亂港。
周遊列國唔使多講，周遊祖國就有必要講多一講，事關係典型反骨仔嘅所作所為。○五年喎，新官上任吹口哨嘅曾蔭權意氣風發，率領全體立法會議員北上訪問廣東，此行對於民主派而言係一大突破。李漢奸貴為民主派龍頭大哥，梗係被奉作上賓啦，時任中共中央政治局委員、廣東省委書記嘅張德江，不但高規格接待，而且邀請李漢奸同枱食飯，齊齊坐上主家席。人哋對你客客氣氣，照道理你應該禮尚往來吖，哈，點不知李漢奸耍出一招反轉豬肚，一個屈尾十返到香港即刻喪鬧「訪粵之旅係一個圈套」。情況就好似你請人食飯，對方食完即刻反枱，話你餐飯係臭嘅，你話係咪冇品！
計功夫茶話齋，李漢奸冇必要唔認賣國啫，事關做漢奸有百利而無一害。一來北京政府奈你唔何，二來香港政府吹你唔脹，三來咯喎，漢奸喺好多人心目中更加係身份象徵。好似○八年北京奧運前夕咁吖，李漢奸喺美國《華爾街日報》發表文章，要求當時嘅美國總統布殊「杯葛奧運」向中國施壓。喂，區區一個香港人居然可以向美國總統指指點點呀，而且提升到外交政策嘅層面，最重要係有外國傳媒願意刊登，幾威水呀！
計功夫茶話齋，賣國求榮嘅漢奸身份絕對唔怕認，甚至乎可以利用呢個尊貴地位參選特首。試想想，做完漢奸做特首，連吳三桂泉下有知都要自愧不如！