「中國人唔係東亞病夫！」呢句說話出自已故武打巨星李小龍之口，鏗鏘有力，當年唔知幾多人拍爛手掌。今日係李小龍七十歲冥壽，此時此刻重溫呢位功夫之王嘅輝煌事迹，更加令人不勝感慨。
由《細路祥》到《唐山大兄》，由《精武門》到《猛龍過江》，香港係李小龍走向世界、揚威全球嘅地方。為紀念呢位一代巨星，本港有團體花兩年時間構思咗一條李小龍事蹟紀念徑，過兩日會向當局提交有關計劃。而喺海外，亦有唔少地方會舉辦各種活動紀念李小龍。
唯獨港府一啲都唔重視，除咗旅遊事務署同康文署合作，喺文化博物館舉辦李小龍專題展覽之外，其他紀念活動基本上都係民間自發組織。
當局成日嘆本港旅遊資源不足，缺少新景點，其實，香港唔係冇新景點，問題係當局肯唔肯去發掘啫。李小龍電影風靡全球，中國功夫揚威世界，一講Bruce Lee，連外國人都豎起拇指讚好嘢，如果港府好好把握，識得推廣，淨係憑「李小龍」呢三個字，都有大把活動可以搞啦。
呢，李小龍嘅鄉下廣東順德就醒嘞，唔止起咗個李小龍樂園，豎起一尊高十八米、目前全球最大嘅李小龍銅像，仲藉李小龍七十歲冥壽呢個大日子，請埋佢個女同孫女參加揭幕儀式添，乜彩都攞晒啦！
睇番香港就眼冤咯。呢，好似李小龍故居改建紀念館咁，業主兩年前已經捐出土地畀港府發展，但因為一啲小問題，項目一拖再拖，遙遙無期。旅遊事務專員容偉雄尋日話，未能同業主就籌建李小龍館達成共識，原因係對方提出加建三層地庫嘅要求，好難過到城規會呢一關喎。
原來港府不單止唔識脫角，連轉膊都唔識。知唔知乜嘢叫具體情況具體處理吖？紀念館唔同普通民居，應該特殊考慮，靈活變通，李小龍係世界級功夫之王，紀念館既可以展示李小龍嘅事迹，又可以畀人懷緬當年「東方荷里活」嘅輝煌，都唔知將會吸引幾多遊客，帶來幾豐厚嘅經濟收益，當局因為一啲小小問題就停晒手，簡直愚不可及。
鬼咩！港府對歷史古蹟一向闊佬懶理。當年港島半山大宅景賢里畀人拆到甩皮甩骨，當局先至急急腳將大宅列為暫定古蹟，但好多藝術精品已經保唔住。仲有吖，有位孫中山當年親密戰友嘅本港故居，竟然變成蝙蝠竇。而更離譜嘅係，風景秀麗嘅大浪西灣，前排有人大興土木，古蹟辦居然矇查查。
港產片《歲月神偷》年初喺柏林影展攞獎，港府乘機抽水，破格留低條永利街，諗住解除「假保育」嘅惡名。可惜，家陣歷史建築幾乎拆清光，連新電影《李小龍》都要去到廣東開平拍外景，計功夫茶話齋，保育失職嘅特衰政府，至係如假包換嘅歲月神偷。