水深火熱！水深火熱！呢鋪真係水深火熱！
水者，鏹水也；火者，縱火也；水深火熱者，鏹水與縱火交替施襲也！
不久前喪心病狂嘅鏹魔到處行兇，特別選擇人來人往嘅通衢大道亂掟鏹水，大家應該猶有餘悸。點不知一波未平一波又起，鏹魔尚未落網之際，失驚無神又多一個甚至幾個縱火狂徒為禍人間，你都咪話唔心寒。
旺角花園街一帶短時間之內先後發生三宗火警，一列排檔燒到火光熊熊不在話下，連鄰近住宅大廈亦遭受池魚之殃，好彩疏散得快咋，否則後果堪憂。根據警方判斷，應該係人為縱火，連燒三處地方可能係聲東擊西之計。如果真係咁，歹徒都算毒辣咯，處心積慮務必要燒到你屁股開花。
縱火嘅動機係乜呢？冇辦法，一如上次鏹水狂徒至今逍遙法外，懸紅緝兇不斷加碼都冇用，警方對於今次咁冷血嘅反社會行為同樣一頭霧水。人未捉，案未破，鬼知佢縱火嘅動機係乜乜東東芫荽葱咩，淨係知道家陣人心惶惶，尤其係全港各處排檔滿街嘅商販區。喂，唔好唔記得，天氣凍喇，濕度低喇，風高物燥之下一個火頭隨時攞你命！
縱火狂徒有心裝你無心，當然係防不勝防，之但係假如街坊街里擁有消防設施，係咪可以及早撲滅火種，防止星星之火蔓延為「火燒連環檔」？理論上當然係咁啦，可惜實際上事與願違，原來特區政府唔知搞邊科，竟然闊佬懶理冇為各區排檔提供消防設施，又冇規定鄰近樓宇安裝消防喉轆等等滅火工具。
好似熙來攘往嘅深水埗鴨寮街咁吖，好多檔主都會將貨物擺過夜，布袋、膠袋、尼龍袋等等易燃物品多到得人驚，而附近居然又冇滅火筒之類嘅消防設施，萬一起火真係唔知點算好。鴨寮街兩旁超過四十幢舊式私人樓宇只有不足四分一有消防入水掣，其中兩個入水掣滿布蜘蛛網，另有幾個大多數殘殘舊舊，冇人夠膽保證功能正常。總而言之，鴨寮街一旦火燒連環檔，好大可能出現「遠水不能救近火」嘅災難性場面。
至於渣甸坊以及廟街排檔咯喎，情況不遑多讓，基本上就係消防設施嚴重缺乏，一不小心就會淪為變態狂徒嘅縱火樂園，燒到你灰頭土臉七竅生煙嗰隻。
唉，計功夫茶話齋，好心警方真係出盡飲奶之力緝捕壞蛋歸案啦，鏹魔仍然未落網已經十分瘀皮，再畀縱火狂徒自由自在通街走更加係剃眼眉。至於消防問題，即使冇人縱火，難保唔會一不小心辣着火頭，正值紅色火災警告高高掛嘅今時今日，你點都要為街坊街里做好防火工作。
即係咁，縱火燒街心慌慌，奈何排檔不設防，你叫人點敢放心行街街呢？平民百姓又點會有一個快樂聖誕呢？平安夜聖善夜，只宜失身，不宜失火，拜託官老爺為民請命一次咁多吖，唔該唔該，阿們阿們！