擔櫈仔，掗頭位，電視有戲睇！
咦咦咦，有乜戲睇搞到功夫茶咁有興趣呀？莫非又係視帝視后傾力演出乜乜豪情、物物嫁到？非也，功夫茶最想睇嘅係財政司司長曾俊華再次粉墨登場。事關政府推出新一輪電視及電台宣傳攻勢，呼籲市民就來年財政預算案發表意見，鬍鬚曾貫徹追女仔至理名言「膽大心細臉皮厚」，唔怕人哋笑到碌地，繼續自己擔綱演出。
鬍鬚曾粉墨登場有幾好笑呢？娛樂性又有幾高呢？如果大家唔太善忘，應該記得舊年嘅「世紀力作」，只見片中曾俊華好似攝青鬼咁閃來閃去，失驚無神喺你背後跳出嚟醒你一句「我會考慮嘅」。嗰種既搞笑又驚嚇嘅場面簡直連視帝都要行埋一邊，所以咯喎，有網民將片段惡搞成《曾俊華．回魂夜》擺上網，聽講點擊率都相當高㗎。
至於今年嘅劇情又係點呢？斷估唔會係《攝青鬼續篇》或者《回魂夜前傳》啩，或者咁啦，不如等功夫茶睇完消化過之後，遲啲有機會再同大家分享一下「視評」。
其實呢，完全唔需要睇到曾俊華嘅宣傳片，功夫茶都可以就財政預算案發表意見，兩個字加一個標點符號講完：派糖！
喂，物價愈來愈高，市民百上加斤，預計有大量盈餘嘅特區政府有乜理由唔開倉派糖先？大家睇睇內地十一月份居民消費價格指數吖，較去年同期大升百分之五點一，遠遠超出預期之外，更加創下二十八個月新高。中港關係唇齒相依，內地物價飛升等於香港同胞受害，水漲船高之下肯定百物騰貴。
聰明嘅香港人一見內地通貨膨脹得咁交關，馬上坐言起行積穀防饑。就好似前日開幕嘅工展會咁吖，馬上成為慳家一族嘅掃貨目標，唔少人扶老攜幼全家總動員見貨就搶，柴米油鹽樣樣唔放過，有人甚至買足一年食油存貨量，你都咪話唔誇張！
工展會作為經濟寒暑表，充分反映今時今日搵食艱難，「慳得一蚊得一蚊」已經係好多人嘅座右銘，甚至你話係掙扎求存嘅處世哲學都未嘗不可。等功夫茶講多次，物價愈來愈高，市民百上加斤，預計有大量盈餘嘅特區政府有乜理由唔開倉派糖先？
另外喎，又有一項民意調查顯示，六成三受訪者認為生活最大壓力係通脹問題，其次係退休生活、交通費或者失業，近兩成半市民期望政府優先處理民生福利問題。負責調查嘅團體就話嘞，政府財政狀況良好，有能力加大經濟投資，並推出措施抗衡通脹，建議提供電費補貼，增撥五億元加強食物援助計劃，凍結政府收費。該團體又建議設立三百億元公共交通收費穩定基金，如果有運輸機構申請加價，當局可以動用基金補貼市民。
計功夫茶話齋，曾俊華表情生硬唔緊要，宣傳爛透都冇所謂，死忍爛忍再忍你飾演多一次回魂夜攝青鬼又點話吖，最重要嘅係真真正正做到福為民開。即係咁，宣傳片係虛嘅，預算案係實嘅，財爺記住要派糖，功德無量！