大家有冇聽過「盛事基金」呢家嘢？斷估應該冇乜聽過，事關政府冇乜宣傳。唔信你試試上網查一查吖，相關消息少得可憐，如果唔係最近立法會議員提到盛事基金，睇怕冇乜邊個會留意。
即係咁，舊年財政預算案喎，政府公布以一億元成立為期三年嘅盛事基金，目的係鼓勵本地機構舉行盛事，推廣香港成為亞洲「盛事之都」。
嗱嗱嗱，大家唔好一聽到「之都」兩個字就嚇到腳仔軟先得㗎，雖然打從回歸以來「乜乜之都、物物中心」確係十居其九爛尾收場，不過今次呢一個盛事之都真係有機會變成現實㗎，事關盛事基金已經批出超過三千萬元資助九個活動，唔似得其他爛尾工程空口講白話。
立法會經濟發展事務委員會討論盛事基金嘅工作進展，政府提交嘅文件指出，審批準則包括活動規模最少有一萬人參與，可提升本港國際形象以及吸引旅客來港等等。過去一年多當局接受過三輪申請，收到四十七份申請書，最終有九份獲批，撥款總額三千五百二十萬元，預料創造超過三千七百個職位。
聽落係咪幾盞鬼呢？即使冇乜宣傳，一樣反應踴躍，九份申請獲批即係有九項盛事啦，學似曾蔭權話齋，呢鋪想窮都難！
咦，咪住先，議員好似有意見喎。立法會旅遊界代表謝偉俊批評，政府成立盛事基金冇推廣，亦冇配套政策支援，吸引遊客好似守株待兔，令旅遊界失望。
謝議員仲質疑，政府成立基金只為敷衍旅遊界，為使錢而使錢，根本冇竭力推動旅遊業，委任基金評審委員會成員亂點鴛鴦：「搵一班唔熟旅遊同缺乏創意嘅人嚟做，結果只有蕭規曹隨，敷衍交差了事，基金點會發揮到功能？」
因乜事幹咁大反應呀？哦，原來九項獲批撥款嘅所謂盛事之中，大多數係已經舉辦多年嘅老牌活動，例如香港網球精英賽、香港龍舟嘉年華、香港高爾夫球總會舉辦的香港女子公開賽，以及香港管弦樂團嘅「港樂．星夜．交響曲」等等，其中單單係香港網球精英賽就獲得一千四百萬元資助，佔資助總額達四成。換言之，新意欠奉，創意欠奉，誠意睇怕都係欠奉，因循苟且嗰隻。
唉，睇嚟功夫茶要收回言論，「盛事之都真係有機會變成現實」呢句說話當冇講過。
其實講真，打造盛事之都到底需要幾多經費呢？區區一億夠唔夠㗎？如果主辦亞運先至算係盛事，咁就大鑊嘞，民政事務局一話申辦二○二三年亞運啫，預算經費大拿拿四百億呀，老細！後來雖然賤賣清倉大減價，講緊都要六十億。你話嘞，盛事基金一億貨仔，點夠使？
總而言之，盛事基金一來冇創意，二來冇乜錢，盛事之都作為另一個乜乜之都，多數都係爛尾收場咯！