有句成語叫做握髮吐哺，係講周公勤政愛民，禮賢下士，凡係有人求見，周公就算沖緊涼都會握住頭髮出嚟接見，就算食緊飯都會立即吐出食物出嚟接待，因為咁，黎民百姓都好樂意發表意見，終於達成西周嘅成康之治。
今時今日，黎民百姓就冇咁好彩喇，咪話冇一位官員會握髮吐哺招呼你，就算你肯提意見，都未必有人肯聽。
話說立法會發展事務委員會原定尋日兩點開會，就市區重建策略聽取市民意見，仲邀請咗幾十個團體參加添。點知團體代表準時到達，等嚟等去都唔見開會，原來呢場公聽會有十四個議員報名，到兩點十五分都只係得七人到場，未夠法定開會人數，甚至連發展局局長林鄭月娥都冇到，搞到一度要宣布流會。
卒之等到三點先至湊夠議員人數開會，但由始至終都冇話畀人知究竟發生咗乜嘢事，搞到團體代表無名火起，覺得唔受尊重，齊齊拉大隊離場抗議，仲遊行到禮賓府表達不滿。委員會主席劉秀成最終要公開道歉。
一場聽取民意嘅公聽會，居然變成一場鬧劇，究竟啲高官同議員去咗邊？原來，林鄭月娥去咗禮賓府接受金紫荊星章，唔得閒應酬市民；至於尊貴議員咯喎，劉秀成就解釋話，可能係部分議員「記錯時間」，先至遲到，你信唔信吖？
有人擔心今次事件可能加重社會戾氣，其實，戾氣又好，怨氣又好，全部都係呢班官員及議員引起。
講真吖，開會本來就係立法會議員嘅主要工作，工作就要有工作嘅態度，點可以粒聲唔出遲大到，好似玩泥沙咁。打個譬喻，如果同樣情形喺私人企業發生，打工仔日日遲大到，或者失驚無神玩失蹤，唔被炒魷就奇。事實上，為咗出席公聽會，唔少團體代表專登請假，有人甚至由外地趕返香港，結果議員遲大到，高官拒出席，連最基本嘅尊重都冇，難怪團體代表扯晒火：「唔通佢哋高高在上，基層市民嘅時間就唔係時間？」
講開等人，功夫茶諗起幾個月前，湖北武漢市十名交警接獲通知，喺烈日下大汗疊細汗苦等半粒鐘，任務就係等交通局政委到場視察，然後排隊畀領導為佢哋抹汗做騷。件事曝光後，武漢交通局政委被輿論封為官場影帝。
正所謂，天下烏鴉一般黑，天下官僚一般懶。今次事件證明，港官一樣係影帝，所謂諮詢民意不過係一場戲。官員扮大牌，鍾意嚟就嚟，唔嚟就唔嚟，市民就好似茄喱啡，呼之則來，揮之則去，真係豈有此理！
官員係咁，議員又係咁，近年立法會流會已成為家常便飯，旨意佢哋為民喉舌，好難咯。唉，政府漠視民意，立法會扯貓尾，唔怪之得香港管治愈來愈差，社會愈來愈亂喇！