名牌未必係正嘢，一分錢原來買唔到一分貨。今次直資學校審計風暴，唔止吹到家長跌晒眼鏡，打破望子成龍嘅好夢，納稅人更因為畀人「打荷包」而谷到爆。
審計署上禮拜踢爆直資學校「混帳」之罪，教育局拖到前日至向立法會政府帳目委員會交代違規學校名單「作內部參考」。不出所料，直資學校行政同財政管理混亂嘅醜聞，就好似揭開坑渠蓋咁，愈揭愈臭，愈睇愈得人驚。
原來，名校最耍家嘅唔係春風化雨作育英才，而係炒股炒樓搏命斂財，肥到襪都着唔落。呢，其中一間違規直資學校公然違反指引，持有嘅股票同投資基金超過七千萬元。揸鑊鏟炒呢樣炒嗰樣未夠過癮，仲做埋蝕本生意，以股東身份向一間公司借出廿五萬元，其中有廿萬唔知幾時至收得番。
違規亂投資已經離晒大譜，部分直資學校仲涉及借「捐款」嘅名義掠水，公然喺食物部同供應飯盒嘅承辦合約入面訂明，營辦商要捐錢畀校方至可以簽約。唔止手段近乎威逼，開價同樣攞命，一年五萬二千元，五年多謝盛惠廿六萬元。蝕本生意冇人做，羊毛出在羊身上，呢條數最終咪又係由幫襯營辦商嘅同學仔孭番！咁即係間接向家長開刀啫！
更離譜嘅係，收番嚟嘅捐款並唔係用於改善教學質素，而係作舉辦周年晚宴呢類未經認可嘅開支項目，記入政府經費帳。仲有學校被揭發，賣習作簿等物品所獲得嘅利潤，超過咗當局規定嘅百分之十五，食得唔好嘥，一於賺到盡。
衰嘢爆完一鑊又一鑊，納稅人睇到眼火爆，當局對直資學校運作明明有成套規定，校方居然當透明，鍾意點就點。教育局長期以來對直資學校冇監冇管，令違規行為變本加厲。呢次揭發出嚟嘅問題，好可能只係冰山一角。
審計署直指帳目混亂喺直資學校相當普遍，市民尤其係學生家長都希望盡早知道邊間學校違規。但直資學校議會負責人就話審計報告以偏概全，唔贊成公開受審核直資學校名單。教育局迫於民意輿情，尋晚決定公開有關資料。
講真，直資學校相當一部分資源來自公帑，嚴格嚟講唔係完全私營。家陣盤數七國咁亂，家長一頭霧水，唔通納稅人無權知道發生咗乜事？唔通市民冇知情權？
直資學校亂象，當局唔係唔知，而係視而不見，闊佬懶理，任由呢啲學校變土皇帝。更荒謬嘅係，原來部分學校甚至連審計署都無權查帳目，根本就係肆無忌憚嘅特權王國。
可怒也！家陣當納稅人廢o架？使得公帑就要接受監督。有權使公帑又毋須畀人睇盤數，有冇離譜啲吖？計功夫茶話齋，對有規不依、濫用公帑嘅直資學校，納稅人絕對有權閂水喉，一個崩都唔畀！