冇監冇管，卒之出事。審計署踢爆部分直資學校行政混亂，帳目不清，甚至不務正業炒樓炒股。教育局監管失職成為眾矢之的，市民都希望盡快知道真相，追究到底，點知當局仲喺度玩神秘，唔肯公布帳目有問題嘅直資學校名單，簡直豈有此理！
審計署署長鄧國斌形容呢次審計結果係「拋磚引玉」，希望其他直資學校可以改善管理咁話。計功夫茶話齋，應該叫「揭坑渠蓋」就真，唔揭猶自可，一揭嚇死你。
直資學校每年接受政府資助超過二十四億，有關規定列明，接受資助者必須轉為非牟利學校。但部分學校居然有例不依，儲備充裕仲狂加學費「掠水」，甚至用政府津貼炒股炒樓搵真銀。審計署估計，大多數直資學校都有類似嘅行政混亂、違規運作現象，問你驚未！
公帑被濫用，教育當局闊佬懶理，已經夠混帳，更離譜嘅係，醜聞曝光後，當局竟然以立法會政府帳目委員會程序作擋箭牌，對相關學校名單秘而不宣。
咁都得？全港有七十二間直資中、小學，入讀學生超過六萬人，審計報告踢爆種種醜聞，家長和學生有權知道到底邊間學校出咗問題，而納稅人亦有權知道究竟公帑係咪用得其所。更何況，立法會帳委會已決定展開聆訊，如果當局唔公開涉事學校名單，聆訊展開之前，唔單止學生同家長嘅憂慮有增無減，本身清白嘅學校更無端端要受到拖累，面對各種懷疑，水洗都唔清。
再講吖，帳委會開唔開會，同公唔公布有問題直資學校名單完全係兩回事，咁嘅藉口根本唔成理由。教育局話喎，如果帳委會決定要求政府到立法會解釋，會盡量披露資料。照咁講法，係咪議員唔問，當局就會繼續隱瞞，有問題嘅直資學校就可以繼續混帳，學生家長繼續任人宰割，教育局繼續闊佬懶理？簡直係歪理，九唔搭八！
講真，每年廿幾億公帑資助絕對唔係細數，學校帳目唔清唔楚，監管部門不聞不問，教育局已經嚴重失職，家陣畀人踢爆仲遮遮掩掩，左閃右避，仲諗住借帳委會過橋，剝奪市民嘅知情權，更加係錯上加錯。
話時話，直資學校亂象唔係今日至有，舊年基督教臻美黃乾亨小學暨初中學校因為帳目不清，搞到滿城風雨，市民記憶猶新。估唔到教育當局冇吸取教訓，當冇事發生，聽之任之，由得直資學校繼續無王管，為所欲為，卒之又搞出個大頭佛。
咪話功夫茶玩踢爆，當局拒絕公開違規直資學校名單，表面睇係想令有關學校免受醜聞困擾，其實真正目的係遮掩自己失職，為自己卸責，畫公仔唔使畫出腸嘞啩。