咦，菲律賓有高級官員大駕光臨喎，仲同曾蔭權會面添，莫非係負荊請罪？你知啦，馬尼拉槍手屠殺香港人質事件血債未還，功夫茶仍然清楚記得事發係八月二十三日，證明係幾咁刻骨銘心，菲律賓政府仍然未向香港人清楚交代當日特蠢部隊點解蠢得咁交關，八位遇難同胞死得不明不白，負荊請罪當然係應有之義啦，略嫌事隔四個月遲咗少少啫。
咪住咪住，睇真啲到底係乜傢伙先，本來之前有消息話訪港嘅高級官員係副總統，點知現身嘅只不過係旅遊部長阿爾韋托．林。嗱，大家唔好怪功夫茶小器呀，菲律賓似乎冇乜誠意喎，煲呔曾假假地都叫做一區之首，你求求其其搵個二打六就話拜訪拜訪，成何體統呀？
點都好啦，聽下訪港嘅林先生發乜嘢噏風。佢話喎，對於人質事件極度遺憾，代表菲律賓總統阿基諾三世向受害者及其家屬，以及所有香港人致以深切慰問同歉意，又轉達菲律賓人民無限同情。
哦。
林部長跟手再介紹菲律賓推出一系列改善措施，希望向到訪當地嘅遊客提供安全環境，措施包括：設立一支由一百八十五名警員組成嘅特別隊伍，喺馬尼拉同其他地區主要景點巡邏，更多警員將為此受訓；安排研討會提升導遊及旅遊巴司機防範罪行嘅意識同技巧；建立一支專責隊伍保護馬尼拉以外景點嘅遊客，尤其係保護自駕遊以及旅遊巴。
哦。
呢一位旅遊部長未噏完㗎，佢話會向死者家屬發放慰問金或者助學金，不過由於未同相關人士商討，所以不能透露金額。至於有記者問佢，菲律賓推出一系列措施係咪想特區政府解除黑色外遊警示呀？林部長回應話，希望有正面作用。
呢嗱嗱嗱，露出狐狸尾巴嘞，原來講來講去無非「推廣旅遊業」，唔怪之得來港嘅唔係副總統而係旅遊部長啦，名義上係賠不是，實際上係攞着數。
計功夫茶話齋，你諗都唔好諗，香港明年二月先至召開死因庭研究人質事件，真相尚未水落石出，話唔定殺人兇手另有其人，你咁快就話奢望香港解除黑色外遊警示？話就話菲律賓自己做過一輪大龍鳳左查右查啫，之但係可信性太低吖嘛，香港人冇可能收貨，梗係要香港嘅死因庭裁定過先至算數。萬一殺人兇手真係另有其人，功夫茶應承你，一定強烈呼籲特區政府永永遠遠對菲律賓發出黑色外遊警示！
即係咁，人質死因一日未確定，菲律賓大官小吏都唔好妄想香港人會放心去當地旅行幫手刺激經濟，冇理由畀完錢你使，仲要畀埋條命過你吖，搵笨都唔好搵得咁過分嘛！
嗱，煲呔曾，千祈唔好耳仔軟呀，唔好以為區區一個旅遊部長送上門打恭作揖，餘怒未消嘅香港人就可以順番條氣呀，更加唔好以為賠少少錢就可以息事寧人，你唔好又扮代表解除黑色外遊警示，否則又係與民為敵。
喂喂喂，等等等，聽聽一段新消息：又有一名四十八歲香港女子喺菲律賓慘遭劫殺。
嘩，林先生，你返鄉下早抖啦，好行夾唔送！