新版閉門造車 消防閉目買車

成語「閉門造車」大家聽得多啦,意思係話又傻又天真嘅戇居仔閂埋門製造交通工具,完全唔理現實世界,結果造出嚟嘅車得物無所用。大家又有冇聽過閉門造車其實有新版本?未聽過哩,咁就等功夫茶講出嚟分享分享。

從前喎,有一個更傻更天真嘅戇居仔,嫌DIY造車太麻煩,百幾萬樣零件不知從何入手,索性出錢買車。之不過咁,呢個戇居仔係瞇埋對眼亂咁買,一來唔理架車有幾高,二來唔理架車有幾闊,話之佢是否可以出入平安。呢一個新版本,叫做「閉目買車」。

呢嗱嗱嗱,唔好以為功夫茶信口開河作古仔,閉目買車真有其事㗎,主人翁叫做消防處。

大家應該都記得消防處救護車不少已經老化,車齡超過十年嘅不計其數,搞到經常死火跪低,最得人驚係害到有緊急需要嘅傷者病人隨時延誤救治。為咗解決呢個生死攸關嘅嚴重問題,政府撥款三億八千萬元畀消防處購買二百八十一架新救護車,其中二百三十五架取代舊車,四十六架係新增嘅,每架造價約一百一十萬元。第一批新救護車於去年初投入服務,到咗今年十月底,新救護車數目已經超過二百架。

好嘞,你估新車落地就可以解決老爺車死火問題咩?冇錯係唔會死火跪低,不過竟然寸步難移,因為消防處買車之前原來冇考慮適合香港道路使用嘅大小尺寸。首兩批抵港嘅七十多架新車,比舊款老爺白車高出三十厘米,無法通過限高三米嘅通道。至於車身嘅闊度,又比舊車多咗十厘米,連沙田救護站正門亦無法進出。

喂,萬一有人需要白車救命,咁啱現場又有一條限高三米嘅通道,咁點算呀?唔理三七二十一直接夾硬衝過去吖,定係左兜右兜搵個老遠地方泊好之後再徒步跑過去救死扶傷?

由於新救護車實在太闊,所以位於沙田源禾路嘅沙田救護站正門貼出一道充滿黑色幽默嘅告示:新款救護車請勿進出紅閘。唔好怪功夫茶無厘頭或者政治不正確,呢個告示令人諗起「華人與狗不得內進」。

成件事荒謬成咁,難怪立法會議員葉偉明直斥消防處訂購新車敷衍塞責,佢話:「買車冇可能唔理規格,如在緊張時刻才發覺因為車身過高而要兜路,肯定會延誤救援。」

正所謂屋漏更兼連夜雨,當戇居仔遇上老油條嘅時候,你估會發生乜嘢事吖嗱?原來喎,消防處早於○九年向建築署求救,要求將沙田救護站出入口擴闊,哈,事隔一年有多嘞,擴闊方案仍未落實,何時動工遙遙無期。

唉,消防處買錯車都唔係第一次㗎啦,點解硬係唔識得吸取教訓嘅呢?如果真係人蠢冇藥醫,咁就唔應該淨係換車,不如換人冇咁嬲。嗱嗱嗱,你唔好同功夫茶講,其實牽涉嘅係不可告人嘅「枱底交易」,呢家嘢唔講得笑㗎,報警拉人都有之!