諗起都覺得搞笑，家陣如果畀你見到一條尖牙利齒嘅鱷魚，你或者會興高采烈走去圍觀，只要唔係行差踏錯誤墮鱷魚潭，你應該會睇得非常開心；之但係萬一畀你見到一隻弱不禁風嘅小雞雞，嘩！走鬼呀！救命呀！禽流感呀！
粉嶺坪輋聽講又話發現鱷魚蹤迹，如果係真嘅，希望漁護署唔好再似得幾年前咁搞到笨手笨腳啦。大家記唔記得上次元朗山貝河「圍捕貝貝」有幾狼狽？勞師動眾捉鱷魚，捉來捉去捉唔到，最終要遠道從澳洲請一位鱷魚先生來港助拳。
至於處理禽流感問題咯喎，功夫茶都係嗰句，希望周一嶽唔好再似得舊時咁搞到笨手笨腳啦。
呢嗱，禽流感又殺到埋身喇。居於屯門嘅五十九歲婦人上月與家人到內地華東旅遊，回港後出現持續發燒以及咳血等徵狀，先後去過屯門醫院及私家醫生求診，最後至確診感染H5N1禽流感，轉送瑪嘉烈醫院隔離治療，情況嚴重。衞生官員懷疑係外地傳入個案，但患者亦去過本港街市，所以唔排除本地感染嘅可能性。既然有人中招，政府將流感大流行應變計劃提升至嚴重，仲召開跨部門會議，提出應變八大措施添。
食物及衞生局局長周一嶽話喎，由於香港街市已經採用「活雞日日清」措施，所以冇辦法抽驗活雞樣本。衞生防護中心就話會加強化驗所有嚴重肺炎個案，了解有冇禽流感病毒。
唉，一提到禽流感，深受其害嘅香港人自然「聞雞色變」。香港大學感染及傳染病中心總監何栢良指出，未計最新呢一宗，今年全球已有三十九人感染禽流感，二十人死亡，死亡率高達五成一。何栢良強調本港與內地來往頻繁，促請港府必須加強監察，切勿掉以輕心。
講得一啲都冇錯，切勿掉以輕心。你知啦，周一嶽有名你叫「周一鑊」，防疫往績真係不敢恭維，烏龍作風令人啼笑皆非。最經典嘅一幕係豬流感爆發期間，周局長呼籲市民打防疫針，而且身先士卒捋起衫袖先捱一針。點不知，原來打完針之後有機會產生嚴重副作用，嚇到一個二個耍手擰頭，卒之幾百萬支疫苗冇人問津，白白報廢，一來浪費大量公帑，二來完全失去防疫意義。
禽流感呢家嘢，最高風險嘅病毒源頭始終係小雞雞，雖然話香港街市「活雞日日清」啫，非法入口嘅走私雞又點呀？傳染病專科醫生勞永樂就話嘞，只集中監察從正常途徑來港嘅活雞作用不大，必須加強堵截走私雞。
有記者問到，周局長呀周局長，今次病人事隔十二日先至入院確診，期間接觸過不少社區人士，醫護人員有冇鬆懈呀？周局長就話嘞，難以評論是否鬆懈，因為大部分病人都係人類流感，要有額外徵狀先至會警覺。
計功夫茶話齋，分明係護短死撐！
點都好啦，禽流感再一次兵臨城下，功夫茶真心希望周一鑊切勿笨過舊時，必須紮紮實實做好防疫工作。畢竟人命關天，局長獻醜事小，市民冇命事大！