未入正題之前，等功夫茶同大家講一講佛偈——
見山是山，見水是水；見山不是山，見水不是水；見山還是山，見水還是水。
嗱嗱嗱，睇到一頭霧水嘅各位唔好柴台住，呢幾句玄之又玄嘅佛偈好出名㗎，佛家弟子應該無人不曉。當然啦，功夫茶未有咁高道行同大家解釋箇中深意，只係想話畀大家聽，特區政府一眾官僚睇怕個個遁入空門，一個二個講佛偈。
好嘞，言歸正傳，前日海洋公園發生嚴重事故，登山鐵路海洋列車涉嫌人為出錯，司機誤按緊急掣突然煞車，導致兩列列車總共一百零七名乘客好似搖骰仔咁一仆一碌。緊急煞車造成七人受傷，傷得最重係一名七十歲老翁，撞甩棚牙，滿面鮮血，昏迷危殆。
點解話官僚講佛偈呢？即係咁，運輸署話喎，海洋列車唔係列車，所以不受該署監管。警務處就話嘞，列車司機唔係司機，所以冇必要接受酒精測試。至於成件事嘅定性，警察公共關係科係咁講嘅，根據《道路交通條例》第五十六條，只有道路上行走嘅交通工具發生意外，先至會列作「交通意外」，今次發生嘅係「意外受傷」。換言之，交通意外不是交通意外，佛偈講到沒完沒了。
海洋列車點解唔係列車？列車司機點解又唔係司機？請恕功夫茶冇乜慧根，真係唔明佢哋講乜東東芫荽葱，淨係可以從一個比較世俗嘅角度入手，九成又係官老爺縮骨卸膊啦！
流血事件發生之後，海洋公園發言人表示會徹查，又向受傷、受驚以及受影響嘅遊客致歉，仲話將會為列車煞車掣安裝保護裝置，完成後盡快重新啟動。
計功夫茶話齋，查鬼查馬咩，唔使徹查咯，反正運輸署話唔關佢哋事，列車不是列車吖嘛，警方又闊佬懶理，司機不是司機吖嘛，查完咁又點呢？海洋列車繼續無人監管，情況同無人駕駛差不多。
由於縮骨官僚齊卸膊，所以名義上海洋列車只須向機電工程署交報告，交完報告點樣跟進梗係冇人知啦。
話時話，諗諗下都幾得人驚，萬一遁入空門嘅官老爺講佛偈講到走火入魔，成個香港隨時七國咁亂。大家試想想，既然列車不是列車，司機不是司機，交通意外更加不是交通意外，佛偈隨時可以無限延伸：人命不是人命，禍港不是禍港，殃民不是殃民。到時咯喎，官老爺就同一個賊冇乜分別㗎喇，為非作歹不是為非作歹吖嘛！
當然啦，走火入魔論純粹係推測，目前為止縮骨卸膊嘅範圍應該僅限於海洋列車。好心身為海洋公園老頂嘅商務及經濟發展局局長劉吳惠蘭認真檢討下啦，實在有必要敦促各大部門好好監管海洋列車，萬一有司機醉酒駕駛咁點算呢？今次就話撞甩牙啫，下次搞到車毀人亡邊個賠呀？如果劉吳惠蘭任由海洋列車繼續無人監管，功夫茶一定會醒你一句佛偈：局長不是局長！