港府諗縮數，計劃推行自願醫療保險，美其名曰「十全醫保」，查實係十不全嘅天仙局。既然係天仙局咯喎，市民梗係唔收貨啦。
呢，立法會衞生事務委員會尋日開聽證會，七十個醫學界、保險業、民間組織、病人組織等團體大晒冷，除咗少數團體支持，絕大部分團體齊聲反對，可見醫保計劃完全不得人心。正如醫學會負責人話齋，套餐式收費將保險業計算風險成本嘅責任推畀私家醫生，要醫生包醫、包底，將貨就價，簡直戇居！公立醫院醫生代表亦唔客氣，直斥政府應該增撥資源，唔係倒轉過來用公帑補貼病人去睇私家醫生，唔通驚私家醫生搵錢唔夠多咩！有人鬧得仲到肉，乜嘢糖衣陷阱吖、寶藥黨吖，簡直妙語連珠。
其實，所謂自願醫保，只包住院，唔包門診，連消委會亦認為咁樣會令市民忽略疾病預防，反而增加日後嘅治療成本。有區議員講得更直接，不如將準備推行醫保計劃嘅五百億元公帑，用嚟改善公共醫療服務仲實際喇。
冇錯喇，群眾眼睛係雪亮嘅，港府愈吹，只會愈令人反感。三歲細路仔都知，推行醫保，將病人趕去私家醫院，將唯一全民共享嘅醫療福利剝奪埋，只會益咗保險公司同私家醫院，就好似強積金計劃咁，最受益嘅唔係打工仔，而係養肥咗嗰班基金經理。
話時話，殺頭生意有人做，蝕本生意冇人做。如果醫保計劃無利可圖，保險公司點會有興趣玩？唔通真係貼埋錢做善事咩！不過咁，計功夫茶話齋，醫保計劃最大得益者唔係保險公司，亦唔係私家醫院，更加唔係市民大眾，而係一味諗縮數嘅港府。
有人話醫保計劃係政府出豉油市民出雞，呢個比喻認真一針見血。無論當局點樣包裝，成個計劃目的只有一個，就係打劫市民。
公共醫療問題多多，歸根究柢係資源不足，分配不公。講起嚟真係丟架，原來本港公共醫療支出佔生產總值唔夠百分之三，遠遠落後於其他先進國家及地區。當局其實有足夠財力改善公共醫療服務，可惜呢個政府孤寒到冇朋友，始終唔肯增加資源，反而一味向市民尤其係中產階層開刀，由急診室收費、病房加價到藥物名冊制度，冇一樣唔係搵市民老襯。
自願醫保仲離譜，直頭想將病人趕出公立醫院。表面上人人受保，終身續保，其實只係為有能力嘅健康及中產人士而設，最需要醫療服務嘅長者同病人反而冇得受惠。社區組織人士就質疑得啱嘞，要六十五歲以上長者每月供一千二百五十蚊醫保？仲多過生果金，周一嶽試吓落區聽吓公公婆婆意見，睇吓出唔出到條邨？
唉，周一嶽眼裏面只有個錢字，點會睇到呢班老人家吖。一句講晒，信佢一成，雙目失明，自願醫保？慳啲喇！