公立醫院又有醜聞！有位病人多次求醫居然未能搵出病因，結果因為延誤治療，病情急轉直下，生命危在旦夕。唉，醫管局草菅人命，去公立醫院睇病等於搵命博，入咗去隨時出唔番嚟。
任職保安員嘅張生正值壯年，平時無病無痛，今年八月肚痛肚脹入北區醫院，醫生話小腸冇事，並無大礙，開刀後將多餘嘅水唧走，幾日後就叫病人出院。病人其後又肚痛，轉去睇私家醫院，懷疑係腹膜炎，當晚轉介到伊利沙伯醫院。
呢次伊院認真啲，畀病人留院五個禮拜，仲入埋深切治療部，可惜又係搵唔出病因。無可奈何之下，張生惟有出院，但幾日後手術傷口爆裂，流水流膿，於是再入北區醫院檢查，證實係腸穿，醫生話等六個禮拜會自動埋口，仲建議佢住幾日就出院。
呢次仲大鑊，病人出院後傷口流出排泄物，剖腹檢查發現小腸大動脈阻塞，已經成條壞死，無法進食，要靠嗎啡止痛同吊鹽水續命。
係人都知，斷症係治病救人最基本同最關鍵嘅步驟，斷錯症分分鐘錯失醫治良機，如果診斷敷衍了事，不負責任，直頭係攞命。同一病症，兩次開刀，出入醫院幾次，拖足三個幾月，居然連病人患嘅係乜嘢病都搞唔清楚，簡直匪夷所思。
無獨有偶，北區醫院上個月亦被踢爆，有病人受心悸同心絞痛折磨四年有多，一直喺呢間醫院求診，院方堅持話無大礙。點知病人久醫未愈，於是去睇私家醫生，證實患上冠心病，而且有七成心臟血管閉塞。
如果一早搵出病因，病人點會白白浪費咗醫治嘅寶貴時間？你話嘞，公立醫院咁嘅醫療水平，咁嘅服務質素，叫病人點接受？家屬點會唔扯火？納稅人又有乜理由唔愈來愈失望吖？
講真，令市民冇晒信心嘅，何止北區醫院一間。打錯針、派錯藥、開錯刀呢類醜聞，喺公立醫院根本係家常便飯。呢，前排醫管局檢討舊年十月至今年三月發生嘅二十宗嚴重事故，有一半係遺留手術紗布、導管導引線、損壞儀器嘅零件喺病人體內，簡直千奇百怪，諗都諗唔到。而近年公立醫院醫死人事件，多數係疏忽大意所致。咁嘅服務水平，病人可以齊齊整整出番嚟，真係要劏雞還神咯。
醜聞事故無日無之，公立醫院已經病到神仙都難打救，港府當務之急係出重招、落重藥，執番好醫管局，重建市民信心。呢，醫管局行政總裁梁栢賢新官上任，如果呢位新掌門人有心改革，依家就係大顯身手嘅時機喇。
話時話，改善管理同醫生睇病差唔多，無論乜嘢奇難雜症，只要斷啱症，對症下藥就有康復機會。計功夫茶話齋，梁栢賢想證明佢呢個「本地薑」勝過過江龍，就要切切實實做好呢份工，如果好似前任蘇利民咁，改革得把口，搞到唔湯唔水，遲早又係提早執包袱㗎咋！