呵——欠——伸個懶腰先——
頭重重，眼矇矇，好唔好詐假意請病假返屋企瞓個懶覺呢？唔得唔得！做人係唔可以咁懶散嘅，功夫茶都係打醒十二分精神努力工作！
咦，審計署又發表報告喎，睇睇今次講乜先……哦，明白晒，原來有人唔似得功夫茶咁有自律能力，郁啲都話請病假。
審計報告係咁講嘅，食環署公務員近年平均每年請病假八至九日，舊年平均每人請病假超過十日添，遠比整體公務員平均五日較多。審計署就建議嘞，食環署署長應該訂定清晰嘅雙管齊下策略，加強病假管理，促進職業安全及健康，並規定須向高層管理人員定期匯報推行病假策略嘅進展以及所遇到嘅問題。
食環署有乜嘢解釋呢？佢哋話喎，可能同大部分初級員工戶外工作或體力勞動有關，所以較容易患病或者受傷，所以要請病假。之不過咁，審計署似乎唔收貨，認為食環署應該查出真正原因。
查乜鬼嘢原因吖，其實一字咁淺：懶！開講都有話，懶人多屎尿，對於食環署嚟講咯喎，懶人多病假！
嗱嗱嗱，唔係功夫茶老屈食環署㗎，呢一個「大懶蛇俱樂部」案底纍纍，前科多到嚇死人。好似今年七月咁吖，本報記者連日直擊三名負責打掃灣仔峽公園一帶嘅食環署清潔工，三人每日平均工作兩小時，然後隨即各自耍樂，有人匿到體育館午睡，有人行街街購物，有人返屋企休息。懶都未夠，記者更加發現有人蛇王期間飲酒，跟住再大模廝樣推住大堆垃圾走去變賣。
由於蛇王偷懶事件實在太多太多，功夫茶怕悶親大家，淨係講多一單。冇耐之前有市民喺九龍城獅子石道發現一行四人清潔工，藏身舊樓天台蛇王，唔係瞓覺就係傾偈。難得嘅係，食環署證實接獲相關投訴，經調查後發現投訴屬實，已向清潔承辦商發出警告信。
所以話啫，如果你話食環署因為好多人偷懶而頻頻請病假，睇怕冇人夠膽話你講錯。喂，整體公務員每年平均都係請五日病假之嘛，食環署居然多咗成倍，有冇咁多病痛呀？
萬一，如果，假設，食環署真係特別多人患病，而唔係純粹偷懶咁簡單，咁又點呢？學審計署話齋，咁就真係有必要促進職業安全及健康喇。再唔係咯喎，搵人睇睇風水甚至打番堂齋，不過記住唔好用公費喎，一定要病魔纏身嘅員工自己夾錢，無謂浪費公帑吖嘛。
如果你問功夫茶，食環署裏面邊一條大懶蛇最懶呀？答案一定係署長梁卓文。你知啦，上樑不正下樑歪，如果唔係上司懶到出汁，下屬冇可能咁放肆。再講吖，監管不力嘅原因係乜嘢呀？一係蠢囉，一係懶囉，斷估梁卓文唔會認自己蠢到出汁啩，所以就一定係懶於監管。
點都好啦，功夫茶奉勸食環署所有懶骨頭蛇王一句，病假特別多一定要小心保重，外國曾經有研究指出，請得病假多嘅人有機會早死。雖然呢個結論有少少「阿媽係女人」，病得多自然死得早㗎啦，不過依然有少少參考價值。即係咁，冇病扮有病，好鬼死邪o架，一個唔覺意變咗早死短命種就大吉利是！