馬路如虎口係人都知，交通意外無日無之，「路上零意外、香港人人愛」呢支咁動聽嘅歌仔，基本上只可能存在於運輸署官老爺嘅幻想世界。假如你唔知好彩定係唔好彩，仲可以好似網上流傳嘅「汀九橋電單車夫婦影片」咁樣，全程直擊一場死亡車禍。大家又有冇諗過除咗車水馬龍嘅公路之外，其實仲有另一個危機四伏嘅「交通黑點」？
功夫茶身邊就有一位朋友，冇耐前之嘛，諗住去吐露港單車徑踩單車做運動啦，點不知失驚無神，哎吔！砰嘭！撞到一仆一碌，傷勢都幾重㗎！
冇錯嘞，單車徑亦係另類交通黑點，絕對唔應該等閒視之。根據運輸署統計數字顯示，○五至○九年五年期間，全港每年平均發生一千六百多宗涉及單車嘅意外，其中致命意外有十宗，嚴重意外有二百一十七宗。發生於單車徑嘅意外，每年平均五百八十二宗，致命意外平均一宗。
既然單車徑危機四伏，運輸署係咪應該加強安全保障呀？唔講大家可能冇察覺，原來單車徑有好多「官方御賜陷阱」，就係嗰啲俗稱「神主牌」嘅鋼製倒Ｕ字形減速欄。所謂減速欄，本來嘅設計構思係咁嘅，運輸署唔想你自以為係單車王子黃金寶或者亞運冠軍李慧詩，所以就人為設限唔畀你超速駕駛，戙幾支「神主牌」喺單車徑上面咯喎，咁你咪迫於無奈要減速囉。問題就係，減到速就話冇事啫，萬一減極都減唔到，哎吔！砰嘭！又係撞到一仆一碌！
倒Ｕ字形減速欄仲有另一問題，喂，今時今日單車發燒友好鬼死多㗎，「神主牌」非常容易成為阻人前進嘅交通樽頸，單車徑隨時大塞車。
運輸署平時雖然比較後知後覺，不過今次總算有番少少作為，佢哋話喎，正籌備為全港單車徑做「大手術」，計劃五年內淘汰一千多個「神主牌」，以比較有彈性嘅膠柱取代，藉此減低意外殺傷力。運輸署同時亦計劃喺單車徑加設提示標誌，部分單車徑旁邊加建行人路，減少「人車爭路」嘅碰撞機會。至於其他考慮，斜路不能太斜啦，急彎不能太急啦，諸如此類。
計功夫茶話齋，後知後覺點都好過不知不覺，改善單車徑毫無疑問大有必要。你知啦，踩單車愈來愈受歡迎，一來係健體強身嘅運動，二來係節省車錢嘅美德，三來咯喎，以一雙玉腿作為動力來源，唔怕排放廢氣污染環境，絕對係地球嘅好朋友，即使踩下踩下唔覺意放屁，環保團體睇怕都會原諒你。
係呀，踩單車甚至係國際潮流，就好似北歐咁吖，愈來愈多人棄用汽車改用單車，為環保出一分力吖嘛。
講到呢度，功夫茶有一個建議，麻煩運輸署喺禮賓府以及政府總部一帶加設單車徑，等曾蔭權政府一眾高官身先士卒踩單車出出入入。尤其係嗰個非常失敗嘅環境局局長邱騰華，更加有必要日日夜夜踩單車。喂，鬼叫你邱局長保護環境不力，空氣質素毫無寸進，擴建堆填區居然夠膽死企圖侵佔郊野公園，唔罰你踩單車向地球先生贖罪點得呀！
總而言之，改善單車徑，救人救地球，功德無量，阿彌陀佛！