影視處一制兩法　淫賤黎無限放生

你知啦，曱甴呢一種令人討厭嘅昆蟲擁有匪夷所思嘅特異功能，捉又難捉，拍又唔死，一嘢沖落坑渠咩，哈，佢有本事喺坑渠嘅另一個出口施施然爬番出嚟，雖然污糟邋遢，不過點都叫做保住一條小命。有人甚至做過實驗，斬咗曱甴一半身軀，居然仲有活動能力。所以話啫，小強作為曱甴嘅另一個叫法，真係相當貼切㗎，夠晒頑強吖嘛。

至於人形小強淫賤黎咯喎，情況差不多，你攞拖鞋兜口兜面拍落去咩，一個閃身又唔知閃咗去邊。稍稍唔同嘅係，曱甴嘅頑強生存能力係自己靠自己，斷估全人類唔會將小強當作受保護動物啩，而淫賤黎就有人幫拖，未必一定靠自己，靠山通常係官僚，亦可以話係港英餘孽。

嗱嗱嗱，又嚟喇，影視處再次放生淫賤黎，今次真係唔記得係第幾次，總而言之就係好多好多次。

今年六月，本報揭發三份六合彩報《創富》、《六合皇》及《貼士皇》偷偷更改承印人資料，涉嫌違反《本地報刊註冊條例》。負責監管嘅影視處當時表示會將案件交由律政司跟進，時隔好耐嘞，本周一先至交由警方以「報刊上未有印上承印人名稱及地址」嘅控罪起訴三報。之不過咁，所謂起訴只係形同玩泥沙，事關當局只告出版人公司，由淫賤黎擔任董事嘅承印人公司就完全冇事。

點解只告出版人公司，唔告承印人公司呢？學者宋立功直斥，案中出版人公司只係形同「雞棚」嘅空殼公司，隨時只係頂罪嘅「豬仔」，即使今次被控，下次亦可以改名重犯，始終冇揪出真正違法嘅幕後黑手。

影視處告一間唔告一間，淫賤黎再一次獲放生，你話嘞，係咪官僚幫拖救小強吖？

「一國兩制」大家聽得多，有冇聽過「一制兩法」？一個制度，兩種法律，執法人員視法治如無物。好似今次公然包庇淫賤黎，頂罪豬仔就告，幕後黑手就唔告，擺明「一制兩法」。

「一制兩法」仲有另外一種情況㗎，雙重甚至三重標準之下，唔同對象會有唔同待遇。如果你係正人君子好似東方報業集團，你會遭受選擇性檢控；如果你係人形小強，好似淫賤黎旗下壹淫媒，你一來唔會惹官非，即使真係被控以違反《淫褻及不雅物品管制條例》，定罪過百次嘞，你一樣乜事都冇，事關所謂懲罰只係罰款一萬幾千濕濕碎。

功夫茶之所以咁有意見，其實係有一個為國為民嘅理由，因為內地非法六合彩實在害人不淺，而鼓吹賭博嘅六合彩報就係禍國殃民嘅罪魁禍首之一，淫賤黎既然埋沒良心承印六合彩報，又被人源源不絕走私北上，荼毒同胞，就好似曱甴隨處散播病菌咁樣，你冇可能任得佢四圍躝。

彩禍荼毒同胞唔係講笑㗎，傾家蕩產又有，家破人亡又有。最新例子聽落極之可悲，福州有一個爛賭婆喎，沉迷地下六合彩欠下一屁股債，鋌而走險綁架鄰居六歲小童，勒索家長三十萬元，點不知，人哋都乖乖獻上贖金啦，肉參仍然被撕票。

影視處放生淫賤黎都習以為常咯，壹傳媒旗下網站VDO NEXT V壹網一段名為「如何自行檢查乳房」嘅短片，本月初被淫褻物品審裁處評為第二類物品（不雅物品），影視處竟然以「網站已修改警告字眼」為由，拒絕採取檢控行動。

計功夫茶話齋，影視處一制兩法，淫賤黎無限放生，受害嘅係神州大地千千萬萬地下六合彩變態賭徒！