弊傢伙！功夫茶忽然覺得書到用時方恨少，識字率大幅降低，唔係好明白「體恤」兩個字係點解。好，唔識問到識，問問啞老師。字典呀字典，「體恤」點解呀？啞老師話喎，即係體諒而憐憫。
大家係咪認為功夫茶有少少失常呢？小學生都識得「體恤」點解啦，好人好姐冇理由仲要去查字典啫。大家有所不知嘞，事關作為全港公屋大管家嘅房屋署話就話會為有需要人士「體恤安置」，不過實際做法似乎同體諒而憐憫完全無關，咁就搞到功夫茶一頭霧水。不如咁，睇睇到底發生乜嘢事先吖。
有一位二十二歲嘅阿偉，不幸自小患上大腦麻痹，身體機能不斷退化，本來要用拐杖行路，後來更加要用輪椅代步。簡單咁講，阿偉係一位殘障人士。阿偉原本係寄居特殊學校嘅，但係宿位愈來愈緊張，為求有瓦遮頭擋風擋雨，阿偉於是透過社會福利署向房屋署申請「體恤安置」。
講到呢度，假如你係正正常常嘅一個地球人，而又啱啱遇着剛剛任職房屋署，你會點做呀？冇錯嘞，你會安排一個適合輪椅出入嘅公屋單位畀阿偉，咁先至叫做最起碼嘅體諒而憐憫吖嘛。
哈，吹得佢脹吖，原來房署職員唔係正常地球人！救——命——呀！
署方第一次編配黃大仙上邨一個單位畀阿偉，唔好意思，大門係冇辦法安裝斜道嘅，即係輪椅唔可以出入。安置失敗，再嚟再嚟。
署方第二次編配元洲邨一個單位畀阿偉，大門終於入得到，總算跨出第一步。之不過咁，屋內有一道主力牆阻頭阻勢，輪椅同樣唔可以出入。
嗱嗱嗱，你話係咪激氣吖？一次係咁，兩次係咁，冇人夠膽拍心口保證第三次會唔會又係咁。所以話啫，所謂「體恤安置」完全睇唔到有任何體諒而憐憫，直情係處事僵化嘅官僚作風玩殘市民！
對於一次又一次嘅無厘頭編配，阿偉非常失望咁講：「我撐住兩支拐杖，去咗幾次睇樓，我好想知點解房署要亂咁派屋！」急需上樓嘅阿偉惟有期望下次唔會再出錯。
計功夫茶話齋，身為大腦麻痹病患者嘅阿偉唔使咁激氣，反而應該掉轉頭「體恤」房署。點解咁講呢？好簡單啫，斷估房署唔係惡意蠱惑小市民啩，咁就剩番另一個可能，該署官僚集體患上大腦殘障，一個二個智力殘障！
智商無下限，官僚盡腦殘，完全值得體諒而憐憫。不如咁啦，等功夫茶呼籲全港市民以及所有正常地球人為房署打打氣。努力呀！加油呀！第三次為阿偉編配適合輪椅出入嘅公屋單位，應該唔會再撞板o架喇！
萬一真係再撞板咁又點呢？咁就冇辦法嘞，唔該署長柏志高即刻執包袱離開地球，返去外太空鄉下「腦殘星」！