通常喺千年古墓或者帝王陰宅至可以搵到嘅乾屍，居然周不時出現喺本港尋常百姓家，死者更加係政府嘅「照顧對象」。唔怪得人哋話，香港幾怪都有咯。
近排本港發生多宗獨居人士喺屋企死去多時至被發現嘅悲劇，唔少個案都涉及政府部門疏忽失職。嗱，話口未完元朗又有一單，呢次死者唔係年老無依嘅長者，而係有病在身嘅中年人。
元朗大旗嶺村一位患有精神病、靠綜援生活嘅獨居中年男子，舊年曾因單車意外受傷，出院返屋企後一直冇露面。女屋主今年八月十二日上門，發現門被物件阻塞開唔到，於是向元朗警署報案，但當值警員一聽個案涉及綜援戶，即刻變Ａ字膊，拒絕立案，叫女屋主去搵社署。
點知社署一樣卸得就卸，唔肯正面回應有冇事主消息不特止，仲點來點去，話搵唔到人係「租務問題」，要業主自己搞掂。無奈之下，女屋主惟有放棄求助官府，尋日自己請人幫手開門，點知入屋一睇愕晒然，獨居租客就瞓喺房門口，屍體已經發黑變乾，好明顯已經死咗一段日子。
女屋主上門唔係催交租，而係驚有乜意外。業主同租客非親非故，純屬買賣關係，尚且知道要關心獨居人士。警方同社署，一個負責保障市民安全，另一個以幫助有需要嘅市民為服務宗旨，居然各自畫地為牢，互相推諉鬥卸責，仲點到女屋主氹氹轉，簡直豈有此理。
社署強調，一直以來每月都會透過自動轉帳代死者交房租，聽落好似已經做好份工咁。對一個患有精神病，又跌斷過腳嘅市民，咁嘅服務就算「仁至義盡」？要求低唔低啲吖？女屋主批評得啱嘞，警方對租客失蹤個案闊佬懶理，社署明知事主有病都唔跟進，完全係不負責任。如果當局派人定期探訪，悲劇絕對唔會發生。
查實，應該講悲劇重演至啱，失救猝死冇人知嘅個案，呢次已經係一個月內爆出嘅第三單。七月中，石硤尾大坑西邨揭發一宗長者夫婦死去多時冇人知嘅人倫悲劇；過咗冇幾日，葵涌梨木樹邨又有一名六旬獨居男子被發現倒斃家中。都係嗰句，如果政府唔係玩隱形，主動關注同協助呢班弱勢「隱形」市民，類似悲劇完全可以避免。
講開又講，申訴專員黎年早前曾狂炳個別衙門存有「各家自掃門前雪」心態，對問題袖手旁觀。嗱，呢次一出事，警方同社署即刻楚河漢界，做嘢分得一清二楚，對市民應負嘅責任就忘得一乾二淨，簡直就係典型中嘅典型。
已故美國總統列根講過，政府唔能夠解決問題，因為政府本身就係問題。計功夫茶話齋，政府部門各家自掃門前雪，懶理市民生與死，小事變大事，大事變悲劇，證明列根講得一啲都冇錯啦！