嘩！地下執到寶，問天問地攞唔到！
如果大家想做奪寶奇兵，功夫茶提提你，可以去大埔碗窰……咦，咪住先，亂咁奪寶好似唔係幾道德喎，細細個老師都有教啦，路不拾遺吖嘛，最好當然路不拾寶。既然係咁，當功夫茶冇講過，大家千祈唔好去大埔碗窰做奪寶奇兵，雖然嗰度真係通街都係寶。
若然大家唔明功夫茶到底講緊乜乜東東芫荽葱，不如先從一場黑雨講起。相信各位都記得今年七月有一場黑雨搞到大埔碗窰村名副其實水浸眼眉，甚至有人被突如其來嘅洪水沖走，結果沖出吐露港變成碧海浮屍。村民怒不可遏，紛紛指摘渠務署害死人，事關村民相信係河道上游嘅渠務工程造成阻塞，結果洪水一發不可收拾。
洪水殺人固然係慘到極，呢場黑雨更加導致另一場文物大災難。碗窰之所以叫做碗窰，因為當地實實在在係一個製造碗碗碟碟嘅古舊工場，已經有幾百年歷史，由明代中葉開始一直投產至一九三二年。好衰唔衰落大雨，大量珍貴文物就咁沖到山腳底。
講到呢度，大家一五一十明白晒啦啩，大埔碗窰村鄰近一帶真係可以地下執到寶，可能係明代瓷碗，可能係清朝瓷碟，總之就係古董，街坊街里個個都有資格做奪寶奇兵，只要你拋開道德嘅枷鎖。
之不過咁，有人或者仍然一頭霧水咁問，既然係咁珍貴嘅古代遺迹，大埔碗窰村唔係應該得到周詳保護嘅咩？點解可以任由珍貴文物沖到山腳底？問得好！可惜功夫茶唔識答。
其實呢，大埔碗窰曾被認定為中國境內唯一保存完整嘅窰場，遺址早於一九八三年已經被列為法定古蹟，至今差不多三十年。理論上負責保護嘅當然係古物古蹟辦事處，可惜吖，古蹟辦出晒名辦事不力，三十年來管理差到冇朋友，卒之淪為滿目瘡痍。
遠嘅唔講嘞，淨係睇番前一排全城喊打嘅大浪西灣事件。有富豪想將香港人嘅後花園私有化，大興土木破壞自然生態，如果唔係傳媒揭發再加網民怒吼，後知後覺嘅特區政府都唔知發生乜嘢事。更加荒謬嘅係，原來大浪西灣事發地點一早已經被列為考古遺址，群情洶湧之下古蹟辦先至趷個頭出嚟戇居居證實，係呀，嗰度真係考古遺址嚟㗎。
即係咁，你靠古蹟辦去保護大浪西灣咩？唔係話唔得，難過摑完警察唔使坐監咁解囉。所以咯喎，大埔碗窰村情況不容樂觀，珍貴文物隨時灰飛煙滅。
計功夫茶話齋，激嬲全世界嘅法官姪女Amina如果想將功贖罪，不妨走去古蹟辦見人就摑，兜口兜面一巴二巴摑到承認失職為止，摑完之後唔好講I want to leave，而係話，唔該你哋盡心盡力保護古物古蹟啦，懶鬼！