亡羊唔補牢，羊遲早走晒，咁簡單嘅道理連小學生都識，但班高官好似永遠都唔識吸取教訓，搞到不斷重蹈覆轍，尤其係對威脅市民身家性命嘅安全隱患繼續扮盲，真係靠害。
今年一月馬頭圍道發生冧樓死人慘劇，揭發樓宇內部結構被人改動，劏房無王管嘅問題引起關注。慘劇發生後，當局係威係勢，又話要加強巡查，又話要加強執法，點知事到如今，劏房唔單止未見收斂，反而更加惡化添。
呢，油麻地新填地街有幢樓齡超過四十年嘅舊樓，四成住宅單位被改成劏房，有啲單位仲鑿開牆身增設獨立門口，樓宇結構受破壞，防火能力打折扣，加裝嘅鐵閘又向外開，萬一有火災，住客逃生無路，只能坐以待斃。
地舖商戶反映，樓上單位前年改成套房之後，舖頭出現多處裂紋，愈睇愈得人驚。又難怪商戶擔心嘅，消防漏洞加上結構隱患，有起事嚟，等於旺角嘉禾大廈大火再加土瓜灣冧樓慘劇，到時實死得人多，唔擔心就假。
成個計時炸彈戙喺鬧市，當局想扮盲都唔得喇。屋宇署五月底終於發出維修令，指劏房單位影響走火，違反《建築物條例》，要求業主兩個月內將單位恢復原狀，如果唔理會就會提出檢控咁話。點知限期已過，業主仍未將單位還原，屋宇署齋噏唔做嘢，唔怪得畀人批評係無牙老虎喇。
講開又講，呢隻無牙老虎真係離晒譜，署方話，對新填地街樓宇單位發出維修令，係因為涉及走火安全喎。冇錯，走火安全梗係要重視喇，但劏房問題又點呀？唔通樓宇結構安全就唔使理呀？數據顯示，全港每年因拒絕清拆僭建物被檢控嘅個案有幾千宗，但涉及樓宇消防安全違例個案嘅檢控數字，○七年到依家都係零。照咁睇，新填地街舊樓違規劏房清拆命令過晒期都冇人理，直頭「正常」過正常啦，屋宇署做啲唔做啲，唔止九唔搭八，簡直係廢廢地！
消除安全隱患，政府責無旁貸，以呢幢舊樓嚟講，劏房前年已經存在，當局今年年中至發現問題，如果大吉利是呢段時間出事點算？屋宇署使唔使孭鑊？署方巡查不力，發現問題又冇及時跟進，好明顯係失職啦。
有油尖旺區議員話，區內好多舊樓都改咗劏房，成日有街坊投訴劏房引起嘅安全同環境問題。馬頭圍道冧樓事件後，佢哋曾經要求屋宇署主動巡查區內劏房，署方回應話冇計劃咁做。咁咪即係任得呢啲計時炸彈繼續存在？即係搵市民條命較飛？豈有此理！
劏房愈來愈猖狂，當局闊佬懶理，既冇相應法例去規管，連最起碼嘅巡查亦懶得做，試問屋宇署班高官，你哋點面對冧樓慘劇中喪生嘅無辜市民？