末代會考進入倒數階段，下星期三就係歷史時刻，係生係死全靠成績決定。呢個世界，由細到大，成績差打屁股，成績好冇痛苦，所以人人都想做會考狀元，最理想梗係有大學拔尖，醒你一個「預先批核」提早取錄啦。之不過咁，呢條祖宗十八代故老相傳嘅人生大道理原來係有例外o架，譬如話，特區政府管治成績差，竟然唔使打屁股！
管治成績差到乜嘢程度呢？即係咁，有個叫做新論壇嘅組織做咗一項民意調查，顯示市民對政府嘅管治信心持續疲弱，五大範疇嘅十九項管治評分之中居然有多達十六項不合格，十一項評分比今年三月下跌。如果以會考做比喻，等於報考十九科，肥佬十六科，十一科成績仲係人衰行路打倒褪。你試下攞一份咁嘅爛鬼成績走去搵學校收留吖，人哋肯定眼尾都唔會睄下你，唔叫你返去重讀幼稚園都算畀面咯。
呢一項民意調查嘅評分以七分最高、一分最低、四分屬於普通水平。結果顯示受訪市民對於政府嘅「民生政策」、「經濟發展及規管」、「政府運作」以及「政制」四大範疇給予不合格評分，四個範疇嘅平均分只係介乎三點二至三點四六分，形同成績表扱咗四隻黑豬仔。唯一叫做合格嘅範疇係「人權自由」，得到四點二三分。
如果你問，因乜事幹政府管治瓣瓣唔掂，唯獨是「人權自由」會有掹車邊合格評分？功夫茶會咁樣解釋，人權自由包括言論自由，言論自由包括批評自由，正正因為政府表現差劣吖嘛，所以咪引發市民不停批評囉。正如懶到出汁嘅衰仔唔肯讀書，考試成績餐餐滿江紅，阿媽梗係日鬧夜鬧o架啦，所以阿媽嘅「人權自由」係得以充分發揮嘅。
十六項肥佬評分之中，最低分嘅係「問責制」、「避免官商勾結，利益輸送」、「改善貧富懸殊」以及「提供公平競爭」，全部都係三分以下。「問責制」評分低到貼地咁滯，反映嘅就係一眾縮骨官僚敷衍塞責，明明成績差都唔肯趷高屁股畀阿媽打。你話嘞，祖宗十八代故老相傳嘅人生大道理係咪有例外吖？
新論壇代表警告，政府未有解決貧富懸殊同官商勾結等等問題，又缺乏了解市民想法嘅決心，只會令自己淪為跛腳鴨以及夕陽政府。新論壇又以最近嘅八達通出賣市民私隱為例，政府冇做好監管工作，民望勢必難以回升。
唉，講開八達通呢一場私隱線大災難，其實亦係管治成績差到無倫嘅鐵證。喂，八達通嘅最大股東係港鐵，而港鐵嘅最大股東又係特區政府，咁就等於官老爺間接出賣市民啦，即使唔係存心掠水，起碼已經嚴重失職。
計功夫茶話齋，失民心，失天下，政府作為一隻鴨，跛就跛硬o架嘞，問題只係會唔會有人振臂一呼號召「鹽焗跛腳鴨」咁解嘅啫。大家都應該記得反高鐵事件啦，成件事根本就係鹽焗跛腳鴨嘅前奏，立法會變咗焗爐，群眾包圍高官，高官焗住被困。
總而言之，衰仔乖啦，唔好成日攞份爛鬼成績獻世啦，激死阿媽搵山拜咩！