茵茵重生喇！茵茵回港喇！茵茵創造奇迹嘅故事證明人間有愛，多謝各位善長仁翁！多謝各位杏林高手！
全名蔡文茵嘅十一個月大女嬰茵茵，患有「單肺合併同側氣管軟化狹窄症」，出生即有多重畸形，包括心臟、右肺及血管缺無，雙側氣管狹窄而且脊柱側彎，導致僅有嘅左肺呼吸道阻塞，呼吸困難，危在旦夕。好彩香港人以至世界各地嘅仁人君子一向樂善好施，經過本報廣泛報道，東方日報慈善基金及太陽報愛心基金全力協助，短短時間之內已經火速籌得足夠醫療費用畀茵茵去台灣榮民總醫院接受手術，肺部氣管置入支架。國泰航空公司同樣見義勇為，一口答應提供機位畀茵茵、家人以及相關醫護人員飛去台灣。
其實，茵茵剛剛抵達台灣嘅時候，情況非常危急㗎，呼吸本來已經困難，再加上感染肺炎又發高燒，嚇到蔡媽媽即刻走去台北大龍峒保安宮祈求保生大帝庇佑。功夫茶當然唔敢講係咪神靈庇佑啦，總之事實就係手術非常成功，茵茵肺部氣管置入支架之後已經痊愈，家陣生蹦活跳表情多多。所以蔡媽媽就喺記者會話嘞：「真是好神奇，茵茵前一天晚上還在發高燒，第二天做完手術後就馬上可把所有喉管拔掉！」
講真，除咗神靈庇佑之外，最大功勞應該係港台兩地醫術精湛嘅杏林高手以及所有古道熱腸嘅善長仁翁。榮總副院長李壽東係咁講嘅，感謝香港、台灣同全世界各地捐款嘅善心人士，茵茵有機會康復有賴於香港醫療界朋友、《東方日報》以及長期合作嘅國際救援組織，而主診醫生宋文舉累積十二年經驗，不斷日以繼夜照料，終於成功醫好茵茵。
講到呢度，功夫茶有少少眼濕濕，事關好人好事呢家嘢，永遠最能夠感動人心。試想想，一個咁精靈可愛嘅ＢＢ女，假如連一歲生日都過唔到，你話係幾咁淒涼？幸得各位讀者伸出援手，盡顯民胞物與嘅大愛精神，茵茵唔單止可以慶祝一歲生日，而且能夠健健康康快樂成長，你話唔感動就假咯！
如果大家唔嫌長氣，請容許功夫茶講多次，多謝各位善長仁翁！多謝各位杏林高手！
世界各地善長仁翁的的確確冇得頂，原本茵茵嘅醫療費用係四十萬元，一經本報呼籲，火速籌夠數之餘更加陸續有來，目前為止善款已經超過一百七十萬！
按照計劃，茵茵會喺今日搭乘國泰航機返香港，而為保一切平安，榮總醫院會特別派出兒科醫生曹珮真沿途照顧。返到香港之後，茵茵會由救護車送去原本接受治療嘅廣華醫院檢查跟進。
講到呢度，功夫茶諗起一本書叫做《死神，別狂傲》，內容係講病人戰勝死神嘅經歷。對於茵茵而言，書名同樣適用，死神，別狂傲，因為有全人類嘅大愛精神照住！