如果大家想扮未卜先知生神仙，功夫茶教你一個百發百中嘅辦法。首先，你裝模作樣唸唸有詞屈指一算，然後，煞有介事聲稱，嗱，根據本山人神機妙算，今日一定爆水管！
當然啦，假扮生神仙玩下好喇，唔好呃神騙鬼傷天害理，更加唔好學無恥神棍氹無知少女上床驅魔，害人害己㗎，監都有得你坐。
點解今日一定爆水管？事關統計數字顯示，○九年有一千零六十六宗，平均每日有三宗，今年頭七個月已經有三百四十宗，平均一日有一點六宗。你話嘞，同類事故無日無之，今日一定爆水管有乜可能唔係開口中？
香港之所以日日夜夜爆水管，東邊爆完西邊爆，大街爆完小巷爆，有時爆到交通癱瘓，有時爆到冇水沖涼，原因係水管過分殘舊，而水務署又笨手笨腳，更換水管進度慢過蝸牛。水務署早於十年前已經承諾，會用十五年時間更換全港水管，時間表家陣都過咗三分二嘞，大家估下完成咗幾多呢？答案係全港仲有五成六水管未換，港島東、葵青以及屯門更加有七成未換。照咁嘅進度睇嚟，未來五年肯定冇辦法完成任務。到咗真真正正換晒所有水管嘅時候，又要重新換過，因為二○○○年最早更換嘅一批將會變得殘殘舊舊。
唉，都話啦，水務署其實係「水皮服務署」，自己敗家不特止，竟然仲有顏面要求市民慳家。冇耐之前水務署話喎，香港人平均用水量偏高，每人每日用一百三十公升水，以及九十公升沖廁水，而香港水費係已發展地區最低，只佔家庭開支約百分之零點二，相當於歐美國家三分一至二分一，所以有需要檢討水費。檢討水費嘅意思係用水愈多收費愈勁，簡單一句就係水費變相加價。
節約用水絕對正確，環保吖嘛，冇人反對。之不過咁，當一個敗家仔走過嚟叫你慳家，你會覺得好滑稽囉。如果大家唔信水務署係頭號浪費食水大戶，麻煩睇睇敗家真面目——
香港水管日漏夜漏兼夾日爆夜爆，每年漏水量超過兩成，合計二億立方米，足以注滿四十七萬個標準泳池，涉及金額大拿拿七億。大佬，漏水兩成呀，年年七億公帑揼落鹹水海，你要小市民慳幾多先至夠數填氹呀？唔通人人唔沖涼共襄善舉咩！
其次咯喎，水務署設計超錯，香港唔係所有地區都鋪設鹹水沖廁系統，好似港島南區、屯門、元朗、西貢同埋離島，用嘅係食水沖廁，受影響人數多達一百三十萬，每年有八千二百萬立方米食水沖落鹹水海。
大佬，食水沖廁呀，眼白白睇住珍貴水資源係咁喺個馬桶不斷沖呀沖，你會唔會覺得水務署係企圖消滅地球嘅怪獸？最衰功夫茶唔係鹹蛋超人吖，否則一定用十字死光對付署長馬利德！
好心馬署長醒少少啦，一係盡快更換水管，一係盡快返去火星，唔好繼續危害地球！